මැරයන්ගේ බිය කිරීමෙන් සිදු වූ බිහිසුණු බස් අනතුර
අද (26) උදැසන මාවනැල්ල සිට කොළඹ බලා ධාවනය වූ පෞද්ගලික බස් රථයක් කොළඹ නුවර මාර්ගයේ මොළගොඩ ප්‍රදේශයේ දී මාර්ගයෙන් ඉවතට ලිස්සා ගොස් අනතුරට ලක් වී තිබේ.
බස් රථය කෑගල්ල, මොළගොඩ ප්‍රදේශයේ දී අනතුරට ලක් ව ඇති බව වාර්තා වේ. අනතුර සිදුවන අවස්ථාවේ බස් රථය තුළ මඟීන් ද සිට ඇති නමුත් කිසිවකුටත් අනතුරක් සිදුවී නොමැති බව සඳහන්ය.
සිදුවීම ඇසින් දුටු අය පවසන්නේ, මෙම අනතුර, පෞද්ගලික බස් රථ දෙකක් අතර ඇතිවූ අරවුලක් මත සිදුවූ එකක් බවයි.
එනම්, මහනුවර සිට පානදුර දක්වා උදෑසන 05.35ට මහනුවරින් පිටත් වූ පෞද්ගලික බස්රථය මාවනැල්ල ප්‍රදේශයේ දී අනතුරට ලක්වූ බස්රථය සමඟ ආරවූලක් ඇති කරගෙන තිබේ.
ඒ අනුව පානදුර බස් රථය ඉදිරියට ධාවනය වී ඇති අතර, ටික දුරක් යන විට පොලු අතැතිව පාරේ සිටි පිරිසක් අනතුරට පත් බස් රථයේ රියදුරුට හා කොන්දොස්තර මහතාට පහරදීමට උත්සාහ කර ඇත.
එම අවස්ථාවේ දී රියදුරුට රථය පාලනය කරගත නොහැකිව මාර්ගයෙන් ඉවතට පැන බස්රථය අනතුරට ලක්වූ බව මඟියෝ සඳහන් කරති.
නමුත් අනතුරට ලක් වු බස්රථයේ කිසිවකු පොලීසියට ප්‍රකාශයක් ලබා නොදීම හේතුවෙන් අනතුර සම්බන්ධව අනෙක් බස්රථයට එරෙහිව නීතිමය ක්‍රියාමාර්ග ගැනීමට නොහැකි බව පොලීසිය සඳහන් කරයි.
