මට්ටක්කුලියේ බිහිසුණු ඝාතනයට 5ක් අල්ලයි - 16 හැවිරිදි අයෙකුත් ඒ අතර

පසුගියදා මට්ටක්කුලිය ප්‍රදේශයේ දී සිදු වූ ඝාතනයට අදාළව සැකකරුවන් 05දෙනෙකු අත්අඩංගුවට ගෙන තිබෙනවා.

පසුගිය 24වනදා දෙපිරිසක් අතර ඇති වූ ගැටුමකට මැදිහත් වීමට යාමේදී සිදු වූ පහර කෑමකින් අදාළ පුද්ගලයා ඝාතනයට ලක්වුණා.

මට්ටක්කුලිය ප්‍රදේශයේ පදිංචි 39හැවිරිදි අයෙක් මෙලෙස ජීවිතක්ෂයට පත්වුනා. සිද්ධිය සම්බන්ධයෙන් පොලිසිය විමර්ශන සිදු කළ අතර ඒ අනුවයි මෙලෙස සැකකරුවන් 05දෙනෙකු අත්අඩංගුවට ගැනුණේ.

ඔවුන් අවුරුදු 16 සහ 38යන වයස් අතර පසුවන මට්ටක්කුලිය ප්‍රදේශයේම පදිංචිකරුවන්.

අත්අඩංගුවට ගත් සැකකරුවන්ගෙන් සිදු කළ ප්‍රශ්න කිරීම්වලට අනුව මරණකරුට පහර දුන් බව කියන යකඩ බටයක්, බොක්ස් බාර් එකක් සහ බයින්ඩින් කටර් එකක් ද පොලිස් භාරයට ගෙන තිබෙනවා.