දුරදිග ගිය බහින්බස් වීමෙන් ඝාතනයක්..

අද (30) උදෑසන මිතුරන් දෙදෙනෙකු අතර ඇති වූ බහින්බස් වීමක් දුරදිග යාමෙන් ඇති වූ ගැටුමක් හේතුවෙන් මුගුරකින් පහර දී එක් අයෙකු ඝාතනය කළ පුවතක් වාර්තා වේ.

ඒ ලිඳුල පොලිස් වසමේ නාගසේන, වලගහවත්ත ප්‍රදේශයේ දී ය.

සැකකරු විසින් මිතුරාගේ හිසට මුගුරකින් පහර දී ඇති අතර පහරදීමෙන් තුවාල ලැබූ මිතුරා ලිඳුල ප්‍රාදේශීය රෝහල වෙත ඇතුළත් කර තිබෙනවා.

ඉන් පසුව වැඩිදුර ප්‍රතිකාර සඳහා නුවරඑළිය රෝහල වෙත ඇතුළත් කර ඇති අතර එහිදී ඔහු මිය ගොස් ඇත.

මෙලෙස මියගොස් ඇත්තේ ලිඳුල පොලිස් වසමට අයත් නාගසේන, වලගහවත්තේ පදිංචිව සිටි වී.බෙන්ජිමන් නමැති 41 හැවිරිදි දෙදරු පියෙක් ය.

මේ අතර ඝාතනය සම්බන්ධයෙන් මරණකරුගේ මිත්‍රයා සැකපිට අත්අඩංගුවට ගෙන ඇත.

ඝාතනය සම්බන්ධයෙන් ලිඳුල පොලීසිය විසින් වැඩිදුර පරික්ෂණ පවත්වනු ලබයි.