ජාතික ගීය රීමික්ස් කළ උමාරා සිංහවංශට කැඳවීමක්..
රාජ්‍ය පරිපාලන හා ස්වදේශ කටයුතු අමාත්‍යංශයට, ජාතික ගීය විකෘති කර ගායනා කළ බවට චෝදනා එල්ලවී ඇති ගායන ශිල්පිණී උමාරා සිංහවංශ ප්‍රකාශයක් ලබාගැනීම සඳහා කැඳවා තිබේ.
උමාරා සිංහවශට අද (02) දිනයේ අමාත්‍යංශය හමුවේ පෙනී සිටින ලෙස දන්වා යවා ඇති බව වාර්තා වේ.
අග්‍රාමාත්‍ය දිනේෂ් ගුණවර්ධන මහතා විසින් උමාරාට එල්ල වූ චෝදනාවත් සමඟ ඒ පිළිබඳ විමර්ශනයක් සිදුකර වාර්තාවක් තමාවෙත ලබාදෙන ලෙස රාජ්‍ය පරිපාලන හා ස්වදේශ කටයුතු අමාත්‍යංශ ලේකම් රංජිත් අසෝක මහතාට දැනුම් දී තිබේ.
ඒ අනුව අමාත්‍යංශයේ විමර්ශන ඒකකයට ලේකම්වරයා විසින් සිදුකළ දැනුම්දීමට අනුව මෙම විමර්ශන ආරම්භ කර ඇති බව සඳහන්ය.
එනම්, රාජ්‍ය පරිපාලන හා ස්වදේශ කටයුතු අමාත්‍යංශයේ අතිරේක ලේකම්වරයෙක් සහ අධ්‍යාපන අමාත්‍යංශයේ සහකාර ලේකම්වරයෙක් විසින් මෙම විමර්ශනය කටයුතු සිදුකිරීමට නියමිතව තිබේ.
එහිදී ආණ්ඩුක්‍රම ව්‍යවස්ථාව උල්ලංඝනයවීමක් සිදුකර තිබේද ? යන්න සම්බන්ධයෙන් මූලිකව සොයා බැලෙනු ඇත. විමර්ශනයට පසු අදාළ වාර්තාව අමාත්‍යංශ ලේකම්වරයාට භාරදී ඉන්අනතුරුව නීතිපති උපදෙස් ලබාගැනීමට නියමිතය.
මේ අතර මෙම සිද්ධිය සම්බන්ධයෙන් විමර්ශන නිලධාරීන් ක්‍රිකට් පාලක මණ්ඩලයෙන්ද ප්‍රකාශයක් ලබා ගැනීමට නියමිතව තිබේ.
