හොඳම තේ දළු නෙලන්නිය තෝරා පත්වෙයි..!

කැළණිවැලි - තලවකැලේ සහ හොරණ වැවිලි සමාගමට අයත් තේ වතුවල හොඳම තේ දළු නෙලන්නිය ලෙස 37 හැවිරිදි ආර්.සිදෙයි අම්මා තේරී පත්ව තිබෙනවා.

වසර 7 ක කාලයක් වතු රැකියාවේ නියුතු ආර්.සිදෙයි අම්මා සමග හොඳම තේ දළු නෙලන්නිය තෝරා ගැනීමේ අවසන් මහා තරගයට තවත් තරගකරුවන් 41 දෙනෙකු ඉදිරිපත්ව සිටි බව වාර්තා වනවා.

කැළණිවැලි - තලවකැලේ සහ හොරණ වැවිලි සමාගම් වලට අයත් වතු 42 ක හොඳම තේ දළු නෙලන්නියන් තේරීම් තරග පවත්වා ඒවායේ ජයග්‍රාහකයින් 42 දෙනෙකු අවසන් මහා තරගයට ඉදිරිපත් කර තිබුණා.

රදැල්ල වතු යායේ හොඳින් තේ වැවුණු කොටසක තේ දළු නෙලීම සඳහා විනාඩි 20 ක කාලයක් අවසන් මහා තරගයේදී ලබාදී ඇති අතර, එහිදී ආර්.සිදෙයි අම්මා අමු තේ දළු කිලෝ 10 යි ග්‍රෑම් 450 ක් නෙලා තරගය ජයගත් බවයි වාර්තාකරු සඳහන් කළේ.