තලේමන්නාරම මාර්ගයේ දුම්රිය ධාවනයේ ආරක්ෂාව ගැන දුම්රිය ස්ථානාධිපතිවරුන්ගේ සංගමයෙන් චෝදනා
මාස ගණනාවක් වසා දමා තිබූ තලේමන්නාරම දුම්රිය මාර්ගයේ සංඥා පද්ධතිය සම්පූර්ණයෙන් යථා තත්ත්වයට පත් නොකර දුම්රිය ධාවනය ආරම්භ කිරීමට පියවර ගෙන ඇති බව දුම්රිය ස්ථානාධිපතිවරුන්ගේ සංගමය චෝදනා කරයි.
එහි සභාපති සුමේධ සෝමරත්න මහතා පැවසුවේ අමාත්යවරයාගේ උපදෙස් මත කඩිනමින් දුම්රිය ධාවනය ආරම්භ කර ඇති නමුත්, මාර්ගයේ ආරක්ෂාවට අදාළ මූලික අවශ්යතා රැසක් තවමත් සම්පූර්ණ කර නොමැති බවයි.
ඔහුගේ ප්රකාශයට අනුව, දිට්වා සුළි කුණාටුවෙන් පසු වසරකට ආසන්න කාලයක් ගතව තිබුණද, මගී පහසුකම් සහ සංඥා පද්ධතිය ඇතුළු අත්යවශ්ය යටිතල පහසුකම් තවමත් යථා තත්ත්වයට පත් කර නොමැත.
වෘත්තීය සමිති විසින් ලබාදෙන ආරක්ෂාවට අදාළ යෝජනා සහ උපදෙස් සැලකිල්ලට නොගෙන කඩිමුඩියේ දුම්රිය ධාවනය ආරම්භ කිරීම පිළිබඳව තම සංගමය දැඩි විරෝධය පළ කරන බව ද සුමේධ සෝමරත්න මහතා සඳහන් කළේය.
මැදවච්චියෙන් එහා ප්රදේශයේ දීර්ඝ කාලයක් ක්රියා විරහිතව පැවති සංඥා පද්ධතිය සම්පූර්ණයෙන් යථා තත්ත්වයට පත් නොවූ අවස්ථාවක අලුයම් කාලයේ දුම්රිය ධාවනය ආරම්භ කිරීම අනතුරුදායක විය හැකි බවට ද ඔහු අනතුරු ඇඟවීය.
කෙසේ වෙතත්, මෙම චෝදනා සම්බන්ධයෙන් දුම්රිය දෙපාර්තමේන්තුව හෝ ප්රවාහන අමාත්යාංශය මෙතෙක් නිල ප්රතිචාරයක් නිකුත් කර නොමැත.
