ක්‍රිකට් ලෝලීන් අමන්දානන්දයට පත් කරමින් කාන්තා ක්‍රිකට් කණ්ඩායම අවසාන මහා තරගයට..!

චීනයේ හැන්ග්ෂුහිදී අද (24) පැවති දෙවන අවසන් පූර්ව තරගයෙන් පාකිස්ථාන කණ්ඩායම පරදා කඩුලු 06ක ජයක් ලබා ගනිමින්, ආසියානු ක්‍රීඩා උළෙලේ කාන්තා ක්‍රිකට් තරගාවලියේ අවසන් තරගයට සුදුසුකම් ලබාගැනීමට ශ්‍රී ලංකා කාන්තා කණ්ඩායම සමත්ව තිබේ.

තරගයේ ප්‍රථමයෙන් පන්දුවට පහරදුන් පාකිස්තාන කාන්තා කණ්ඩායමට නියමිත පන්දුවාර 20 තුළ කඩුලු 9ක් දැවී ලබාගත හැකිවූයේ ලකුණු 75ක් පමණය.

පන්දු යැවීමේ දී උදේෂිකා ප්‍රබෝධිනී කඩුලු 3ක් සහ කවීෂා දිල්හාරි කඩුලු 2ක් බිඳහෙළීය.

තරගයේ ජයග්‍රහණය සඳහා ලකුණු 76ක ඉලක්කය හඹා ගිය ශ්‍රී ලංකා ක්‍රීඩිකාවන් පන්දුවාර 16යි පන්දු 03ක් තුළ කඩුලු 04ක් දැවී ජයග්‍රහණය වාර්තා කිරීමට සමත්වුණි.

ඒ අනුව හෙට (25) පැවැත්වෙන අවසන් තරගයේ දී ශ්‍රී ලංකාව, ඉන්දීය කාන්තා කණ්ඩායම සමග තරග වැදීමට නියමිතය.