තීරණාත්මක තරගයේ කාසියේ වාසිය නවසීලන්තයට..! ශ්‍රී ලංකා කණ්ඩායමෙත් වෙනසක්..

ඔස්ට්‍රේලියාවේ පැවැත්වෙන T20 ලෝක කුසලාන ක්‍රිකට් තරගාවලියේ සුපිරි 12දෙනාගේ වටයේ ශ්‍රී ලංකාව සහභාගී වන 03 වන තරගය නවසීලන්ත කණ්ඩායමට එරෙහිව සිඩ්නි ක්‍රිකට් ක්‍රීඩාංගණයේදී අද (29) පැවැත්වෙයි.

එම තරගයේ කාසියේ වාසිය දිනාගැනීමට නවසීලන්ත කණ්ඩායම සමත් විය. ඒ අනුව ඔවුන් තීරණය කළේ ප්‍රථමයෙන් පන්දුවට පහරදීමේ අවස්ථාව ලබාගැනීමටය.

සුපිරි 12 දෙනාගේ වටය යටතේ ශ්‍රී ලංකාව මේ දක්වා තරග දෙකකට සහභාගී වූ අතර එහිදී අයර්ලන්තය පරාජය කළ ශ්‍රී ලංකාව, ඔස්ට්‍රේලියාව හමුවේ පරාජයට පත්වුණි.

නවසීලන්තය සුපිරි 12 දෙනාගේ වටය යටතේ සහභාගී වූ පළමු තරගයේදී ඔස්ට්‍රේලියාව පරාජයට පත්කළ අතර ඇෆ්ගනිස්ථානය සමග පැවැත්වීමට නියමිතව තිබූ තරගය වර්ෂාව හේතුවෙන් අත්හැර දැමුණි.

අවසන් පූර්ව වටයට සුදුසුකම් ලබාගැනීමට නම් ශ්‍රී ලංකා කණ්ඩායමට අද තරගයේ ජය තීරණාත්මක වේ. බිනුර ප්‍රනාන්දු වෙනුවට අද තරගය සඳහා අසිත ප්‍රනාන්දුව හෝ කසුන් රාජිතව ශ්‍රී ලංකා කණ්ඩායමට කැඳවීමට නියමිතය.

පළමු කාණ්ඩයේ ප්‍රසාද ලකුණු පෙරමුණ තවමත් නවසීලන්තයට හිමිව තිබෙන අතර ශ්‍රී ලංකාව ප්‍රසාද ලකුණු සටහනේ පසුවන්නේ පස්වන ස්ථානයේය.