පැය පහක අයවැය කතාවෙන් ජනතාවගේ ජීවන බර අඩු වෙන්නේ නැහැ - සජිත් ප්‍රේමදාස
ජනාධිපතිවරයා පැය පහක කාලයක් අයවැය කතාව සිදුකළද, එමගින් මෙරට ජනතාව මුහුණ දෙන ගැටලුවලට විසඳුම් ඉදිරිපත් වී නොමැති බව විපක්ෂ නායක සජිත් ප්‍රේමදාස මහතා පවසයි.
2027 මූල්‍ය වර්ෂය සඳහා ජාතික ජන බලවේග රජයේ අයවැය පාර්ලිමේන්තුවට ඉදිරිපත් කිරීමෙන් අනතුරුව මාධ්‍ය වෙත අදහස් දක්වමින් ඔහු මේ බව සඳහන් කළේය.
මිලියන 22ක ජනතාව මුහුණ දෙන ප්‍රධාන ආර්ථික හා ජීවනෝපාය ගැටලු සඳහා මෙම අයවැයෙන් කිසිදු ඵලදායී විසඳුමක් ඉදිරිපත් කර නොමැති බව ද විපක්ෂ නායකවරයා චෝදනා කළේය.
අත්‍යවශ්‍ය භාණ්ඩ මිල ඉහළ යාම, උද්ධමනය සහ ජනතාවගේ ජීවන වියදම දරාගත නොහැකි මට්ටමකට ඉහළ යාම සම්බන්ධයෙන් විසඳුම් ලබාදීමේ වැඩපිළිවෙළක් අයවැයට ඇතුළත් කර නොමැති බව ද ඔහු පෙන්වා දුන්නේය.
එමෙන්ම, රටේ දරිද්‍රතාවය තුරන් කිරීම සඳහා විධිමත් වැඩසටහන් ද මෙවර අයවැයෙන් ඉදිරිපත් කර නොමැති බව සජිත් ප්‍රේමදාස මහතා සඳහන් කළේය.
රජය යෝජනා කර ඇති පොලී රහිත ණය යෝජනා ක්‍රම සම්බන්ධයෙන් ද අදහස් දැක්වූ විපක්ෂ නායකවරයා, ඒවා පවතින බැංකු පද්ධතිය හරහා ක්‍රියාත්මක කිරීමේදී දැනටමත් ණය ලබාගැනීමේ හැකියාව ඇති පිරිස්වලට පමණක් ප්‍රතිලාභ හිමිවීමේ අවදානමක් පවතින බව ප්‍රකාශ කළේය.
ආර්ථික අර්බුදයෙන් පීඩාවට පත්ව සිටින කුඩා හා මධ්‍ය පරිමාණ ව්‍යවසායකයන්ට ප්‍රාග්ධනය සපයා ගැනීමේදී තවදුරටත් දුෂ්කරතාවලට මුහුණදීමට සිදුවනු ඇති බව ද ඔහු පෙන්වා දුන්නේය.
ජනාධිපතිවරයා ඉදිරිපත් කළ ආර්ථික දත්ත අනුව ආර්ථික වර්ධනය මන්දගාමී වී ඇති අතර උද්ධමනය ඉහළ ගොස් ඇති බව ද විපක්ෂ නායකවරයා සඳහන් කළේය.
ඒ අනුව, සාමාන්‍ය ජනතාවගේ ජීවනෝපාය බර අඩු කිරීම සඳහා අවශ්‍ය මානුෂීය විසඳුම් මෙවර අයවැයෙන් සොයාගත නොහැකි බව සජිත් ප්‍රේමදාස මහතා වැඩිදුරටත් ප්‍රකාශ කළේය.
