රු. 230ට තිබූ උපත් පාලන පෙති දැන් රු. 130යි - කාන්තාවන්ට සහනදායී ආරංචියක්

ශ්‍රී ලංකාවේ කාන්තාවන් අතර බහුලව භාවිත වන උපත් පාලන පෙති වර්ග කිහිපයක් මාසයකට වැඩි කාලයක් වෙළෙඳපොළේ හිඟව පැවතීම හේතුවෙන් පාරිභෝගිකයන් දැඩි අපහසුතාවකට පත්ව සිටි බව වාර්තා වේ.

කෙසේ වෙතත්, ශ්‍රී ලංකා පවුල් සංවිධාන සංගමය විසින් බෙදාහරිනු ලබන ‘මිතුරි’ උපත් පාලන පෙති ඇතුළු ඖෂධ වර්ග වෙළෙඳපොළට යළි බෙදාහැරීම ආරම්භ කර ඇති බව එම සංගමයේ ප්‍රකාශකයෙකු සඳහන් කර තිබේ.

උපත් පාලන පෙති ලබාගැනීම සඳහා කාන්තාවන්ට තම ප්‍රදේශයේ පවුල් සෞඛ්‍ය සේවා නිලධාරිනිය හරහා හෝ ඖෂධ අලෙවිසැල් මගින් අවස්ථාව පවතී. එහෙත් පසුගිය මාස කිහිපය තුළ වෙළෙඳපොළේ පැවති හිඟය හේතුවෙන් එම පෙති දෛනිකව භාවිත කරන කාන්තාවන්ට ඒවා සොයා ගැනීම දුෂ්කර වී තිබිණි.

බීබීසී සිංහල වෙත අදහස් දැක්වූ කාන්තාවන් කිහිපදෙනෙකු සඳහන් කර ඇත්තේ ඖෂධ අලෙවිසැල් ගණනාවකින් විමසුවද තමන් භාවිත කරන උපත් පාලන පෙති සොයාගැනීමට නොහැකි වූ බවයි. විශේෂයෙන්ම වෙළෙඳපොළේ සාපේක්ෂව අඩු මිලකට අලෙවි වන ‘මිතුරි’ පෙති දිගු කාලයක් සොයාගැනීමට නොහැකි වූ බව එක් කාන්තාවක් පවසා තිබේ. තවත් කාන්තාවක් සඳහන් කර ඇත්තේ තමන් භාවිත කරන ‘Diane 35’ ඖෂධය ද සොයාගැනීමේ ගැටලුවකට මුහුණ දීමට සිදුවූ බවයි.

ඖෂධ හිඟයට හේතුව මිල සංශෝධනයක්

මෙම හිඟය සම්බන්ධයෙන් බීබීසී සිංහල කළ විමසීමකදී ශ්‍රී ලංකා පවුල් සංවිධාන සංගමයේ අලෙවි අංශයේ ප්‍රකාශකයෙකු සඳහන් කර ඇත්තේ ඖෂධ නියාමන අධිකාරිය විසින් ඖෂධ මිල සංශෝධනය කරමින් නිකුත් කළ ගැසට් නිවේදනයක් හේතුවෙන් ආනයනය සඳහා අවශ්‍ය බලපත්‍ර ලබාගැනීමේ ක්‍රියාවලිය ප්‍රමාද වූ බවයි. ඖෂධ ආනයනය කිරීම සඳහා ලබාගත යුතු බලපත්‍රවල මිල ගණන් යාවත්කාලීන කිරීමට සිදුවීම හේතුවෙන් මෙම ප්‍රමාදය ඇති වූ බවද ඔහු පෙන්වා දී තිබේ. එහි ප්‍රතිඵලයක් ලෙස මාසයක පමණ කාලයක් වෙළෙඳපොළේ ‘මිතුරි’ පෙති හිඟව පැවති බවත්, මේ වන විට දිවයින පුරා ඖෂධ අලෙවිසැල් වෙත බෙදාහැරීම ආරම්භ කර ඇති බවත් එම ප්‍රකාශකයා වැඩිදුරටත් සඳහන් කර ඇත. 

රජයේ ඖෂධ තොගවලට බලපෑමක් නැහැ

මේ සම්බන්ධයෙන් අදහස් දැක්වූ සෞඛ්‍ය නියෝජ්‍ය අමාත්‍ය වෛද්‍ය හංසක විජේමුණි මහතා පවසා ඇත්තේ වෙළෙඳපොළේ ඇති වූ මෙම තත්ත්වය රජය සතුව පැවති ඖෂධ තොගවලට බලපෑමක් ඇති නොකළ බවයි. රජය සතුව ප්‍රමාණවත් තොග පැවති බවත්, ගැටලුව මතුව තිබුණේ පෞද්ගලික ඖෂධ අලෙවිසැල්වල බවත් ඔහු සඳහන් කර තිබේ.

‘මිතුරි’ පෙති මිල රු. 100කින් අඩු වෙයි  

මේ අතර, ඖෂධ අලෙවිසැල් කිහිපයකින් කළ විමසීම්වලදී අනාවරණය වී ඇත්තේ උපත් පාලන පෙති වර්ග කිහිපයක මිල ගණන් සංශෝධනය වී ඇති බවයි. මීට පෙර රුපියල් 230ක මිලකට අලෙවි වූ ‘මිතුරි’ පෙති මේ වන විට රුපියල් 130ක මිලකට අලෙවි වන බව වාර්තා වේ. ඒ අනුව එහි මිල රුපියල් 100කින් අඩු වී තිබේ. ඖෂධහල් ජාලයක සේවය කරන ඖෂධවේදියෙකු ද සඳහන් කර ඇත්තේ තම ආයතනයේ ‘මිතුරි’ පෙති තොග අවසන් වී තිබූ නමුත් මේ වන විට යළි තොග ලැබී ඇති බවයි. එමෙන්ම අනෙකුත් උපත් පාලන පෙති වර්ගවල මිල ගණන්ද අඩු වී ඇති බව ඔහු පවසා තිබේ.

ඇතැම් දිස්ත්‍රික්කවල තවමත් හිඟයක්

කෙසේ වෙතත්, දිවයින පුරා බෙදාහැරීම් ආරම්භ කර ඇති බව ප්‍රකාශ කළද, සෑම ප්‍රදේශයකම ඖෂධ තොග යථා තත්ත්වයට පත්වී නොමැති බව වාර්තා වේ. බීබීසී සිංහල විසින් කුරුණෑගල, අනුරාධපුරය සහ වවුනියාව ඇතුළු දිස්ත්‍රික්ක කිහිපයක ඖෂධ අලෙවිසැල්වලින් කළ විමසීම්වලදී ඇතැම් ඖෂධහල් සඳහන් කර ඇත්තේ තමන්ට තවමත් ‘මිතුරි’ උපත් පාලන පෙති තොග ලැබී නොමැති බවයි. ඒ අනුව, ඖෂධ බෙදාහැරීම යළි ආරම්භ කර තිබුණද දිවයිනේ සියලු ප්‍රදේශවලට අවශ්‍ය තොග ලැබී තිබේද යන්න පිළිබඳව තවදුරටත් අවධානය යොමු කළ යුතුව තිබේ.