චෙන්නායි සුපර් කිංග්ස් කණ්ඩායම තෝරා ගත් මහීෂ් තීක්ෂණට ප්‍රභල විරෝධයක්..ක්‍රීඩා ලෝලීන්ගේ දැඩි අප්‍රසාදය..

මෙවර IPL ක්‍රීඩක වෙන්දේසියේදී, ශ්‍රී ලංකාවේ දඟ පන්දු යවන ක්‍රීඩක මහීෂ් තීක්ෂණ මිලදී ගැනීමට චෙන්නායි සුපර් කිංග්ස් කණ්ඩායම කටයුතු කර තිබුණි.

ඒ පිළිබඳව තමිල්නාඩු ප්‍රාන්ත වැසින්ගෙන් හා චෙන්නායි කිංග්ස් ක්‍රීඩාලෝලීන්ගෙන් දැඩි අප්‍රසාදයක් එල්ලවී ඇති බව ටැමිල් ගාර්ඩියන් වෙබ් අඩවිය වාර්තා කර ඇත.

එම වෙබ් අඩවිය වාර්තා කළේ, මහීෂ් තීක්ෂණ හමුදා නිලධාරියෙක්වීම මෙලෙස එම ප්‍රාන්ත වැසියන්ගේ අප්‍රසාදය පළවීමට හේතුවී ඇති බවය.

15වන ඉන්දියන් ප්‍රිමියර් ලීග් ක්‍රිකට් තරගාවලියේ ක්‍රීඩක වෙන්දේසිය පසුගිය සති අන්තයේදී බැංග්ලෝර්හිදී පැවැත්වුණි.

එහිදී ශ්‍රී ලංකා ක්‍රීඩකයන් පස්දෙනෙකු ඒ ඒ කණ්ඩායම් විසින් මිලදී ගත් අතර ශ්‍රී ලංකාවේ දඟපන්දු යවන ක්‍රීඩක මහීෂ් තීක්ෂණව මිලදී ගත්තේ චෙන්නායි සුපර් කිංග්ස් කණ්ඩායමය.

30 වසරක් පුරාවට පැවති යුද්ධයේදී දමිළ වැසියන්ට සිදුවු තාඩන පීඩන කිසිසේත් අමතක කළ නොහැකි බවත් ශ්‍රී ලංකා මුහුදු තීරයේදී තමිල්නාඩු ධීවරයන්ට හිරිහැර සිදුවන පසුබිමක මහීෂ් තීක්ෂණ මිලදී ගැනීම  අනුමත කළ නොහැකි බවට ක්‍රීඩාලෝලීන් චෝදනා කරන බව එම වෙබ් අඩවිය වාර්තා කර ඇත. නමුත් චෙන්නායි සුපර් කිංග්ස් කණ්ඩායම මේ දක්වා ඊට ප්‍රතිචාර දක්වා නොමැත. 2013 වසරේ IPL තරගාවලියේදී ද  එවකට තමිල්නාඩු මහා ඇමතිනි ජයලලිතා ජයරාම් ශ්‍රී ලංකා ක්‍රීඩකයන් සහභාගී වන තරග වෙනුවෙන් තමිල්නාඩුව සත්කාරකත්වය ලබාදීම ප්‍රතික්ෂේප කර තිබුණි.