පැමිණිල්ලක් කිරීමට ගිය පොලීසිය ඇතුලේ ගුටිබැට හුවමාරුවක්..

දෙපිරිසක් අතර ඇති වූ ආරාවුලකදි පහර කෑමකට ලක් වූ බව කියන පුද්ගලයෙකු පොලීසියට පැමිණ පැමිණිල්ලක් ඉදිරිපත් කරමින් සිටියදී එම ස්ථානයට තවත් පැමිණිල්ලක් ඉදිරිපත් කිරීම සඳහා පැමිණ සිටි අනෙක් පාර්ශවයේ පුද්ගලයෙකුට පැමිණිලිකරුගේ පුත්‍රයෙකු විසින් පොලීසිය තුලදීම පහර දීමේ සිද්ධියක් සම්බන්ධයෙන් කටුගස්තොට පොලීසිය පරීක්ෂණ ආරම්භ කර තිබේ.

කටුගස්තොට පොලිස් බල ප්‍ර දේශයට අයත් ගම්මානයක දෙපිරිසක් අතර ඇති වූ ආරාවුලක් දුර දිගගොස් පහර දී ගැනීම දක්වා වර්ධනය වී තිබිණ. මෙසේ පහර කෑමට ලක්වූ එක් පුද්ගලයෙකු තුවාල ද සමඟ කටුගස්තොට පොලිසියට දිව ගියේ පැමිණිල්ලක් ඉදිරිපත් කිරිම සඳහායි.

එම අවස්ථාවේ ඔහුගේ පුතාද ඔහු සමඟ පැමිණ සිටි අතර අනෙක් පාර්ශවයේ පුද්ගලයෙකුද පැමිණිල්ලක් ඉදිරිපත් කිරීම සඳහා පැමිණ සිටියේය. මේ අවස්ථාවේදී මුල් පැමිණිලිකරුගේ පුතා අනෙක් පාර්ශවයේ පුද්ගලයා දැක කෝපයට පත්ව පොලීසිය තුලදීම ඔහුට පහර දී තිබේ.

එම අවස්ථාවේදී පොලීස් නිලධාරින් ඉදිරිපත් වී ඔහු නවතා අත් අඩංගුවට ගනු ලැබ ඇති අතර පසුව මහනුවර මහෙස්ත්‍රාත් අධිකරණය වෙත ඉදිරිපත් කිරීමට පියවර ගත්තේය. සිද්ධිය සම්බන්ධයෙන් කටුගස්තොට පොලීසිය පරීක්ෂණ පවත්වයි.