ඉන්දියාවෙන් සහල් නැවක් මෙරටට..!

ඉන්දීය රජය විසින් මෙරටට ලබාදුන් සහල් මෙට්‍රික් ටොන් 11,000ක් රැගත් නෞකාවක් දිවයිනට ළඟාවී ඇති බව වාර්තා වෙයි. ශ්‍රී ලංකාවේ ඉන්දීය මහ කොමසාරිස් කාර්යාලය පැවසුවේ සහල් තොගය රැගත් "චෙන් ග්ලෝරි" නෞකාව අද (12) කොළඹට ළඟා වූ බවය.

ඉන්දියාව විසින් ශ්‍රී ලංකාවට ලබාදෙන බහුආංශික සහයෝගීතාව යටතේ පසුගිය සතිය තුළ පමණක් සහල් මෙට්‍රික් ටොන්16,000ක් මෙරටට ලබාදී තිබේ.

දෙරට අතර සුවිශේෂී සබඳතාව පිලිඹිබු කරන මෙම ආධාර තවදුරටත් අඛණ්ඩව සිදුකිරීමට ඉන්දීය රජය පියවර ගන්නා බව ඉන්දීය මහ කොමසාරිස් කාර්යාලය සඳහන් කළේය.

ශ්‍රී ලංකාව මුහුණදී සිටින ආර්ථික අර්බුදය හමුවේ ඉන්දියාව විසින් ඉන්ධන ඇතුළු සැපයුම් හරහා ශ්‍රී ලංකාවට සහාය ලබාදී ඇති අතර ඉන්දීය ණය පහසුකම යටතේ මේ දක්වා ඉන්ධන මෙට්‍රික් ටොන් 270,000ක් ලැබී තිබුණි.