ගෑස් සම්බන්ධව සුභ ආරංචියක්..අද සිට වෙනදේ මෙන්න..

කොළඹ වරාය ආසන්න මුහුදේ නවතා තිබෙන ගෑස් මෙට්‍රික්ටොන් 3,500ක් සහිත නෞකාවෙන් ගෑස් ගොඩබෑම ඊයේ (මාර්තු 17) දහවල් 2.00ට පමණ ආරම්භ කළ බව ලිට්‍රෝ ගෑස් සමාගම ප්‍රකාශ කළා.

ප්‍රධාන පුවත් පතක් කළ විමසීමකදී එහි ප්‍රකාශකයෙකු සඳහන් කළේ, ඒ අනුව හෙට (මාර්තු 18) දින සිට ගෑස් බෙදාහැරීම් කටයුතු සිදු වනු ඇති බවයි.

දිනකට ගෑස් සිලින්ඩර 120,000ක් පමණ නිකුත් කිරීමට අපේක්ෂා කරන බව ද ඔහු ප්‍රකාශ කළා.

ඔහු පෙන්වා දුන්නේ, එම ගෑස් ප්‍රමාණය දින තුනක කාලයක් සඳහා ප්‍රමාණවත් වන බවයි.

එසේ වුව ද මෙරටට පැමිණීමට නියමිත තවත් ගෑස් නෞකා කිහිපයක් සඳහා මාලදිවයිනේදී ගෑස් පිරවීමේ කටයුතු සිදු වෙමින් පවතින අතර ඒ හේතුවෙන් මෙරට ගෑස් සැපයුමට ගැටලුවක් නොවනු ඇති බව ද එම ප්‍රකාශකයා සඳහන් කළා.

ඔහු සඳහන් කළේ, එම නෞකා මේ දක්වා මෙරටට නොපැමිණියේ ඊයේ මෙම ගෑස් නෞකාව තුළ පැවති ගෑස් තොගය නිදහස් කර ගන්නා තෙක් බව ය.

එම නෞකාවේ අඩංගු ගෑස් මෙතෙක් කල් නිදහස් කර ගැනීමට නොහැකි වූයේ ඒ සඳහා ගෙවිය යුතුව තිබූ ඩොලර් හිඟය හේතුවෙන් යැයි ඔහු පැවසීය.

එම ප්‍රකාශකයා සඳහන් කළේ, මේ වන විට අදාළ හිඟ මුදලින් කොටසක් ගෙවා ඇති අතර තවත් සුළු මුදලක් පමණක් ගෙවීමට පවතින බවයි.

අදාළ ගෑස් සැපයුම් සමාගමට ගෙවිය යුතුව තිබූ මුදල් ප්‍රමාණය නොගෙවීම හේතුවෙන් දින 12ක් පුරා කොළඹ වරාය ආසන්න මුහුදේ ගෑස් නෞකා දෙකක් නවතා තිබිණි.

මේ අතර, ලාෆ්ස් සමාගමේ සභාපති ඩබ්.එච්.කේ. වෑගපිටිය මහතා සහන් කළේ, සිය සමාගම සඳහා අවශ්‍ය ගෑස් මෙතෙක් ලැබී නොමැති බව ය.