පොහොට්ටුව යළි ගමට යයි - ජොන්ස්ටන්ගෙන් විශේෂ ප්‍රකාශයක්
ශ්‍රී ලංකා පොදුජන පෙරමුණේ (SLPP) ගමින් ගමට කොට්ඨාස රැස්වීම් මාලාව හෙට (02) සිට කොළඹ දිස්ත්‍රික්කයෙන් ආරම්භ කරන බව එම පක්ෂයේ මෙහෙයුම් ප්‍රධානී ජොන්ස්ටන් ප්‍රනාන්දු මහතා පවසයි.
පක්ෂයේ ජාතික සංවිධායක පාර්ලිමේන්තු මන්ත්‍රී නාමල් රාජපක්ෂ මහතාගේ උපදෙස් පරිදි මෙම වැඩසටහන ක්‍රියාත්මක කරන බව සඳහන් කළ ඔහු, සතියේ දින පහ පුරාම දිවයිනේ විවිධ ප්‍රදේශ ආවරණය වන පරිදි රැස්වීම් පැවැත්වීමට සැලසුම් කර ඇති බව ද පැවසීය.
කොළඹ දිස්ත්‍රික්කයේ ආසන සංවිධායකවරුන් සමඟ පැවැති රැස්වීමකදී ජොන්ස්ටන් ප්‍රනාන්දු මහතා මේ බව ප්‍රකාශ කළේය.
වත්මන් ආණ්ඩුව ජනතාවට ලබාදුන් බව කියන පොරොන්දු සහ ආණ්ඩුව සම්බන්ධයෙන් එල්ල වන වංචා හා දූෂණ චෝදනා පිළිබඳව ජනතාව දැනුවත් කිරීම මෙම රැස්වීම් මාලාවේ ප්‍රධාන අරමුණක් බව ඔහු සඳහන් කළේය.
විශේෂයෙන්ම කන්ටේනර් 323ක් සම්බන්ධ සිදුවීම, ගල් අඟුරු ගනුදෙනුව, මහ බැංකුවේ පරිගණක පද්ධතියට හැකර්වරුන් ඇතුළුවීම සහ වැරදි ගිණුම් වෙත මුදල් යොමු කිරීම සම්බන්ධ සිදුවීම් පිළිබඳව ජනතාව දැනුවත් කරන ලෙස ද පක්ෂ ක්‍රියාකාරීන්ට උපදෙස් ලබාදුන් බව ඔහු පැවසීය.
එමෙන්ම, මැතිවරණ වේදිකාවලදී ලබාදුන් බව කියන පොරොන්දු ඉටු කිරීම සම්බන්ධයෙන් ද ජනතාව දැනුවත් කිරීමට පියවර ගන්නා බව ඔහු සඳහන් කළේය.
විශේෂයෙන් සෞඛ්‍ය සේවා, අත්‍යවශ්‍ය භාණ්ඩ සහ පාසල් උපකරණ සඳහා පනවා ඇති බදු සම්පූර්ණයෙන් ඉවත් කිරීම ඇතුළු මැතිවරණ පොරොන්දු සම්බන්ධයෙන් ජනතාවගේ අවධානය යොමු කරන ලෙස ජොන්ස්ටන් ප්‍රනාන්දු මහතා වැඩිදුරටත් උපදෙස් ලබාදී තිබේ.
