වැඩි මිලට බිත්තර විකුණුවහොත් සිර දඬුවම් - පාරිභෝගික අධිකාරියෙන් නිවේදනයක්

රජය බිත්තර සඳහා පනවා ඇති උපරිම පාලන මිල ඉක්මවා බිත්තර අලෙවි කරන වෙළඳුන්ට මාස හයක සිර දඬුවමක් හෝ රුපියල් ලක්ෂ 50 ක උපරිම දඩයක් නියම කෙරෙන බව පාරිභෝගික අධිකාරිය පවසනවා.

එලෙස බිත්තර අලෙවි කරන සමාගමකට රුපියල් ලක්ෂ පහේ සිට රුපියල් ලක්ෂ 50 දක්වා උපරිම දඩයක් හිමිවන අතර, වෙළඳසැලකට රුපියල් ලක්ෂයේ සිට ලක්ෂ පහ දක්වා දඩ මුදලක් අය කෙරෙන බවයි එම අධිකාරිය වැඩිදුරටත් සඳහන් කළේ.

මේ අතර කුකුල් කෑම සඳහා තමන්ට වැඩි මුදලක් වැය කිරීමට සිදුවීම හේතුවෙන් බිත්තර සඳහා ලබාදුන් පාලන මිල සමඟ සිය ව්‍යාපාරයෙන් ලාභයක් ඉපයීමට නොහැකි බවයි කුකුළු ගොවීන් සුරැකීමේ සංවිධානයේ කැඳවුම්කරු සංජීව කරුණාසාගර සඳහන් කළේ.

එසේම බිත්තර නිෂ්පාදකයින් නව පාලන මිලට බිත්තර වෙළඳපොලට නිකුත් නොකිරීම නිසා වෙළඳපල තුළ බිත්තර හිඟයක් මතුවී ඇති බවයි වෙළඳුන් සහ පාරිභෝගිකයින් පෙන්වා දෙන්නේ.

මේ අතර සුදු බිත්තරයක් සඳහා රුපියල් 43 ක් රතු බිත්තරයක් සඳහා රුපියල් 45 ක උපරිම මිලක් රජය විසින් පනවා තිබියදී රුපියල් 55 කට බිත්තර අලෙවි කළ අනුරාධපුර ප්‍රදේශයේ ව්‍යාපාරිකයෙකුට නඩු පැවරීමට පාරිභෝගික අධිකාරිය කටයුතු කර තිබෙනවා.