පාරිභෝගිකයන් රවටන පරිප්පු පාට කරන ගබඩාව වටලයි..!

ඊයේ (15) පාරිභෝගික සේවා අධිකාරියේ හදිසි වැටලීම් ඒකකයේ නිලධාරීන් පාරිභෝගිකයින් නොමග යවන ආකාරයෙන් පරිප්පුවල ස්වාභාවික වර්ණය වෙනස්කර වෙළෙඳපොළට යැවීම සඳහා ප්‍රති නිෂ්පාදනය කරන ගබඩාවක් වටලා ඇත.

 එම නිලධාරීන් සඳහන් කළේ, අදාළ ගබඩාවේ තිබී මිනිස් ශරීරයට අහිතකර වර්ණකාරක යෙදවූ පරිප්පු ටොන් 4කට ආසන්න තොගයක් සොයාගත් බවය. පාරිභෝගික සේවා අධිකාරියේ හදිසි වැටලීම් ඒකකයට,  උස්වැටකෙයියාව ප්‍රදේශයේ ගබඩාවක ආනයනික පරිප්පු සඳහා වර්ණ ගන්වා වෙළෙඳපොළොට නිකුත් කිරීමේ ජාවාරමක් ක්‍රියාත්මක බවට  ලද තොරතුරක් අනුව වැටලීම සිදුකර තිබුණි.

ඒ අනුව ඊයේ පස්වරුවේ එහි ගිය නිලධාරීන් කණ්ඩායමක් අදාළ ස්ථානය වැටලීය. එහිදී පරිප්පු වර්ණ ගන්වන අයුරු අදාළ ගබඩාවේ සේවකයෙකු විසින් අනාවරණය කළේය. වැඩිදුරටත් පාරිභෝගික සේවා අධිකාරියේ නිලධාරීන් විසින් සිදුකළ පරීක්ෂා කිරීමේදී පරිප්පු සඳහා වර්ණක යොදන යන්ත්‍රෝපකරණ කිහිපයක් ද සොයා ගැනීමට හැකි විය.

මෙහිදී අනාවරණය වී ඇත්තේ, මෙම පරිප්පු ඔස්ට්‍රේලියාවෙන් මෙරටට ආනයනය කරන ඒවා බවත්, පරිප්පු ටොන් 4ක පමණ ප්‍රමාණයක් මෙහි ඇති බවත්ය. එමෙන්ම වෙනත් පුද්ගලයෙකුගෙන් ලබාගත් පරිප්පුවලට මෙහිදී වර්ණක යොදවන අතර එලෙස සිදුකරන්නේ ව්‍යපාරිකයින්ගේ ඉල්ලීම පරිදිය.

එලෙස වර්ණක යොදවන්නේ පරිප්පුවල ගුණාත්මකභාවය වැඩිකර පෙන්වා පාරිභෝගිකයන් නොමගයැවීම සඳහා බව පාරිභෝගික සේවා අධිකාරිය පවසයි. මිනිස් ශරීරයට අහිතකර මෙම වර්ණක පරිප්පු ඇතුළු ධාන්‍ය වර්ග සඳහා යෙදවීම ආහාර පනතෙන් මෙන්ම ශ්‍රී ලංකා ප්‍රමිති ආයතනය මගින් ද තහනම් කර තිබේ.

ඒ අනුව මෙහි සාම්පල ලබාගත් පාරිභෝගික සේවා අධිකාරියේ නිලධාරීන් මෙම ස්ථානයට මුද්‍රා තැබීය. අනතුරුව එහි තවත් ගබඩාවක් අද (16) දිනයේදීත් පරිභෝගික සේවා අධිකාරියේ නිලධාරීන් විසින් සෝදිසි කර එහි සාම්පල ලබාගැනීමක් ද සිදුකළේය.