මගීන් 100ක් සමඟ බස් රථයක් ප්‍රපාතයකට පෙරළී යයි..බරපතළ තුවාල ලැබූවන් නාවලපිටිය රෝහලට.(PHOTOS)
අද (01) අලුයම කොළඹ - හැටන් ප්‍රධාන මාර්ගයේ බස් රථයක් මාර්ගයෙන් ඉවතට පැන ප්‍රපාතයකට පෙරලීමෙන් පුද්ගලයින් 18 දෙනෙකු තුවාල ලබා තිබෙනවා.
වටවල සිංහල විද්‍යාලය අසලදී අලුයම 4.30 ට පමණ මෙම අනතුර සිදුව තිබෙන බවයි වාර්තා වන්නේ.
කොළඹ සිට නුවරඑළිය දක්වා ධාවනය වූ ශ්‍රී ලංකා ගමනාගමන මණ්ඩලයට අයත් මගී බස් රථයක් ප්‍රතිවිරුද්ධ දෙසින් පැමිණි බස් රථයකට මග සලසා ගැනීමට යාමේදී මාර්ගයෙන් ඉවතට පැන ලිස්සා ගොස් පෙරළී තිබේ.
තුවාල ලැබූ මගීන් වහා වටවල ප්‍රාදේශීය රෝහලට ඇතුළත් කර ඇති අතර බරපතළ තුවාල ලැබූවන් නාවලපිටිය දිසා රෝහල වෙත මාරුකර යවා ඇති බවයි වාර්තා වන්නේ.
වටවල ප්‍රාදේශීය රෝහලේ වෛද්‍ය ප්‍රතිකාර ලබමින් සිටින තුවාල ලැබූ මගීන්ගේ තත්ත්වය බරපතල නොවන බවයි එහි ප්‍රකාශකයෙකු සඳහන් කළේ.
අනතුර සිදුවන අවස්ථාවේ අවම වශයෙන් මගීන් 100 දෙනෙකු බස් රථය තුළ සිට ඇති බවටයි වාර්තා වන්නේ.
