අභිමානවත් 76 වන නිදහස් දිනය අදයි..ඒ වෙනුවෙන් කරන්න යන දේ මෙන්න..
Aruna
in ශ්‍රී ලංකාවශ්රි ලංකාව බ්‍රිතාන්‍ය අධිරාජ්‍යවාදීන්ගෙන් නිදහස ලබා වසර 76ක් සැපිරීම නිමිත්තෙන් පවත්වනු ලබන නිදහස් දින සැමරුම් උත්සවය "හදමු අලුත් රටක්" මැයෙන් කොළඹ ගාලුමුයදොර පිටියේදී අද (04) අති උත්කර්ෂවත් අන්දමින් පැවැත්වීමට සියලු කටයුතු මේ වන විට සූදානම් කර තිබෙනවා.
ජනාධිපති රනිල් වික්‍රමසිංහ හා අග්‍රාමාත්‍ය දිනේෂ් ගුණවර්ධන යන මහත්වරුන්ගේ ප්‍රධානත්වයෙන් පැවැත්වෙන මෙම උත්සවයේ ප්‍රධාන ආරාධිත අමුත්තා වශයෙන් සහභාගී වන්නේ තායිලන්තයේ අග්‍රාමාත්‍ය ස්‍රෙතා තැව්සින් මහතායි.
මෙවර නිදහස් දින සැමරම් උත්සවයට රුපියල් කෝටි විස්සක පමණ මුදලක් වෙන් කර ඇතැයි දැනගන්නට ලැබෙන අතර නිදහස් සැමරුම් පෙළපාළිය නැරඹීම සඳහා ජනතාවට ඉඩ ලබා නොදීමට රජය තීරණය කර තිබෙන බව ද පැවසෙනවා.
මේ අතර, 76වැනි නිදහස් දිනය නිමිත්තෙන් ජනාධිපති විශේෂ රාජ්‍ය සමාව යටතේ සිරකරුවන් 600ක පමණ පිරිසක් නිදහස ලැබීමට නියමිතව තිබෙන බව ද වාර්තා වනවා.
මේ ජනාධිපති සමාව ප්‍රදානය කිරීම සඳහා අද (04) සමාවට සුදුසුකම් ලබන සිරකරුවන් මෙරට සෑම බන්ධනාගාරයකින්ම නිදහස් කිරීමට නියමිතව ඇති බවයි, බන්ධනාගාර කොමසාරිස් මාධ්‍ය ප්‍රකාශක ගාමිණි බී. දිසානායක මහතා පවසන්නේ.
ජනාධිපතිවරයා වෙත ආණ්ඩුක්‍රම ව්‍යවස්ථාවේ 34 වැනි වගන්තියෙන් පැවරී ඇති බලතල අනුව බන්ධනාගාරගත සිරකරුවන් හට මේ විශේෂ රාජ්‍ය සමාව හිමිවීමට නියමිතව ඇත.
ඒ අනුව බන්ධනාගාරගතව 2024.02.04 වන දිනට සිර දඬුවම් විඳිමින් සිටින සිරකරුවන් හට ගත කරන ලද වසරකට හෝ ඉන් කොටසකට මාසයක සමාවක් දීම, දඩ මුදල් නොගෙවීම මත 2024.02.04 දින වන විට සිර දඬුවම් විඳිමින් සිටින සිරකරුවන්ගේ ගෙවමින් පවතින දඬුවමේ ශේෂය අහෝසි කිරීම, 2024.02.04 දින වන විට මත්ද්‍රව්‍ය චෝදනා සම්බන්ධයෙන් වරදකරුවන් වී, ඒ සඳහා (දඩ මුදල් නොගෙවීම මත නියමකර ඇති සිර දඬුවම්ද ඇතුළත්ව) පුනරුත්ථාපනයට යොමු කර ඇති සිරකරුවන්ගේ නියම කර ඇති පුනරුත්ථාපන කාලයෙන් හරි අඩක් හෝ ඊට වැඩි කාලයක් ගෙවා අවසන් කර ඇති රැඳවූවන්ගේ පුනරුත්ථාපන කාලයේ ඉදිරි ශේෂය 1999 අංක 46 දරන පනත පරිදි ප්‍රජා විශෝධන නිලධාරියකුගේ අධීක්ෂණය යටතේ ගත කිරීමට යටත්ව අහෝසි කිරීම සිදු කරනු ඇති බවයි පැවසෙන්නේ.
