හෝමූස් සමුද්‍ර සන්ධිය ඇමරිකානු භූමියක් ලෙස සලකනවා - ට්‍රම්ප්

ජනාධිපති  ට්‍රම්ප් පරිපාලනය ඉරානය සමඟ පවතින ගැටුම අවසන් කිරීම සඳහා සාකච්ඡා මාර්ග සොයමින් සිටියද, එක්සත් ජනපදය ඉරාන නැව් සහ වරායන් සම්බන්ධයෙන් මිලිටරි අවහිරයක් අඛණ්ඩව ක්‍රියාත්මක කරමින් සිටී.

මේ අතර, ජනාධිපති ඩොනල්ඩ් ට්‍රම්ප් සිකුරාදා හෝමූස් සමුද්‍ර සන්ධිය “ඇමරිකානු භූමියක්” ලෙස සලකන බව ප්‍රකාශ කළේය.

දකුණු කැරොලිනාවේ පැවති දේශපාලන රැලියකදී අදහස් දක්වමින් ට්‍රම්ප් පැවසුවේ, “අපි ජයග්‍රහණය කළාද කියලාවත් අපි දන්නේ නැහැ. මොකද මම දැන් හෝමූස් සමුද්‍ර සන්ධිය ඇමරිකානු භූමියක් ලෙස සලකනවා” යනුවෙනි. ඔහුගේ ප්‍රකාශයෙන් පසුව ඉරානයට එල්ල කළ බෝම්බ ප්‍රහාර සම්බන්ධයෙන්ද ට්‍රම්ප් උපහාසාත්මක ලෙස අදහස් පළ කළේය. 

“අද සිකුරාදා රාත්‍රියක්. අපට ඕනෑ තරම් කාලය තිබෙනවා. මම තවත් මොනවා කරන්නද? ආපසු ගිහින් ඉරානයට තවත් බෝම්බ කිහිපයක් දමන්නද?” යනුවෙන් ඔහු ප්‍රශ්න කළේය. එම අවස්ථාවේදී ට්‍රම්ප් සිය දේශපාලන රැලිවලදී නිතර කියවන “ද සර්පයා” නම් කවියද ඉදිරිපත් කළේය.

සිකුරාදා වනවිට ඇමරිකානු හමුදා ක්‍රියාත්මක කරන අවහිරයට අනුකූල වන පරිදි වාණිජ යාත්‍රා 68ක් හරවා යවා ඇති බව එක්සත් ජනපද මධ්‍යම අණදෙන මූලස්ථානය (CENTCOM) සමාජ මාධ්‍ය ඔස්සේ සඳහන් කළේය.

ගැටුම මාස හයක කාලසීමාවකට ළඟා වෙමින් තිබියදීත්, එක්සත් ජනපදය සහ ඉරානය අතර සාම ගිවිසුමක් සම්බන්ධයෙන් එකඟතාවකට පැමිණීමට හැකි වී නොමැත.

ට්‍රම්ප් පරිපාලනය ඉරානයට ආර්ථික පීඩනය වැඩි කිරීමේ උත්සාහයක් ලෙස එරට තෙල් අපනයනය සඳහා අත්‍යවශ්‍ය වන හෝමූස් සමුද්‍ර සන්ධිය හරහා ගමනාගමනය සීමා කරමින් සිටී.

ඉරානය සහ ඕමානය අතර පිහිටි මෙම වැදගත් ජල මාර්ගය හරහා සාමාන්‍යයෙන් ලෝකයේ මුහුදු මාර්ග ඔස්සේ ප්‍රවාහනය වන තෙල් සැපයුමෙන් පහෙන් එකකට ආසන්න ප්‍රමාණයක් ගමන් කරයි. එබැවින් එහි ගමනාගමනයට ඇති සීමා ජාත්‍යන්තර බලශක්ති වෙළඳපොළටද සැලකිය යුතු බලපෑමක් ඇති කළ හැකිය.

ජනාධිපති  ට්‍රම්ප් මීට පෙරද හෝමූස් සමුද්‍ර සන්ධිය ඇමරිකානු භූමියක් ලෙස ප්‍රකාශයට පත් කිරීම සම්බන්ධයෙන් අදහස් පළ කර තිබිණි.

ඔහු පවසා තිබුණේ සමුද්‍ර සන්ධිය හරහා තම අවසරයකින් තොරව කිසිදු නෞකාවකට ගමන් කිරීමට ඉඩ නොදෙන බවයි. එමෙන්ම, සමුද්‍ර සන්ධිය “නව එක්සත් ජනපද භූමියක්” ලෙස දැක්වෙන සිතියමක්ද ට්‍රම්ප් සමාජ මාධ්‍ය ඔස්සේ පළ කර තිබුණි.

කෙසේ වෙතත්, ඉරාන නියෝජ්‍ය විදේශ අමාත්‍ය කසෙම් ගරිබාබාඩි ට්‍රම්ප්ගේ මෙම ප්‍රකාශ දැඩි ලෙස ප්‍රතික්ෂේප කරමින් ඒවා “මායාවන්” ලෙස හැඳින්වීය.