2025 පළමු අර්ධ වසරේ බදු ආදායම 26% කින් වර්ධනය

පසුගිය වසරේ (2024) අනුරූප කාලපරිච්ඡේදයට සාපේක්ෂව 2025 වසරේ පළමු භාගයේදී ශ්‍රී ලංකාවේ බදු ආදායම් රැස් කිරීම සියයට 26කින් පමණ ඉහළ ගොස් ඇති අතර, ඒ සඳහා අගය එකතු කළ බද්ද (VAT) සහ සුරාබදු බදු වලින් ලැබුණු ආදායම හේතු වී ඇති බව මුදල් අමාත්‍යාංශය පවසනවා.

වසරේ පළමු භාගය සඳහා වූ ඔවුන්ගේ මූල්‍ය සමාලෝචන වාර්තාවේ මුදල් අමාත්‍යාංශය සඳහන් කර ඇත්තේ, එම කාලය තුළ මුළු ආදායම සියයට 24.8කින් එනම් රුපියල් බිලියන 2,322ක් දක්වා ඉහළ ගොස් ඇති බවයි. එමෙන්ම බදු ආදායම රුපියල් බිලියන 2,152ක් වූ බවත්, එය වසරින් වසර (වසරට සාපේක්ෂව) සියයට 25.9ක වැඩිවීමක් බවත් සඳහන්.

2025 වසරේ පළමු භාගයේදී වැට් බද්දෙන් ලැබෙන ආදායම සියයට 27.6කින් රුපියල් බිලියන 876ක් දක්වා ඉහළ ගිය අතර, මෝටර් රථ සඳහා වන සුරාබදු බද්දෙන් ලැබෙන ආදායම එම කාලය තුළ සියයට 335.6කින් රුපියල් බිලියන 129.1ක් දක්වා සැලකිය යුතු ලෙස ඉහළ ගොස් තිබෙනවා. එම කාලය තුළ ආදායම් බදු ආදායම සියයට 9.2කින් ඉහළ ගොස් රුපියල් බිලියන 489ක් වූවා.

දේශීය ආදායම් දෙපාර්තමේන්තුව එහි වාර්ෂික ඇස්තමේන්තුවෙන් සියයට 47.3ක් ලබාගෙන ඇති අතර, එය 2025 පළමු භාගයේදී එකතු කරන ලද මුළු බදු ආදායමෙන් අඩකට පමණ දායක වෙනවා. මේ අතර, සිගරට් මිල ඉහළ යාමත් සමඟ, 2024 වසරේ එම කාලයට සාපේක්ෂව 2025 වසරේ පළමු භාගයේදී සිගරට් සඳහා වන සුරාබදු බද්ද රුපියල් බිලියන 44.0 දක්වා සියයට 17.9කින් අඩු වූවා.

කෙසේ වෙතත්, මෙම කාලය තුළ ඛනිජ තෙල් මත සුරාබදු බද්දෙන් ලැබුණු ආදායම සියයට 15.5කින් රුපියල් බිලියන 112 දක්වා ඉහළ ගොස් තිබෙනවා. තවද, 2025 පළමු භාගයේදී ප්‍රාග්ධන සහ ශුද්ධ ණය දීම සියයට 8.6කින් රුපියල් බිලියන 224 දක්වා අඩු වූ අතර, මුළු පොලී ගෙවීම් සියයට 10.7කින් රුපියල් බිලියන 1,264.6 දක්වා ඉහළ ගොස් ඇති බවයි මුදල් අමාත්‍යාංශය සඳහන් කරන්නේ.