ගිහිකල වැරදි වලට තරුණ හිමි නමක් දඩුවම් ඉල්ලා පොලිසියට ගිය අරුම පුදුම සිදුවීම මෙන්න..

ගිහියෙකුව සිටියදී කරන ලද සොරකම් සම්බන්ධයෙන් අත්අඩංගුවට ගෙන අධිකරණයට ඉදිරිපත් කර දඬුවම් ලබාදෙන ලෙස ඉල්ලා තරුණ භික්ෂුවක් යක්කල පොලිස් ස්ථානය වෙත ඊයේ (04) පැමිණ බාර වූ සිදුවීමත් යක්කල පොලිසිය පවසා සිටිනවා.

එහිදී මෙම භික්ෂුව පොලිසියට සිය මව සමඟින් පැමිණ ඇති අතර, අනතුරුව භික්ෂූන් වහන්සේ පොලිසිය භාරයට ගෙන පරීක්ෂණ ආරම්භ කර තිබෙන බවයි පැවසෙන්නේ.

එහිදී මෙම භික්ෂුව පොලිසියට පවසා තිබෙන්නේ, තමන් ගිහියකුව සිටියදී මීට වසර අටකට පමණ ඉහතදී කරන ලද මෙම සොරකම්වලට අත්අඩංගුවට ගෙන දඬුවම් ලබාදෙන තෙක් බණ භාවනා කරමින් මහණදම් පිරීමට තරම් හිතට සහනයක් හෝ සැනසිල්ලක් හෝ නොමැති බවයි.

ගිහියකුව සිටියදී තමන් කළ මෙම සොරකම් සම්බන්ධයෙන් නිතර හිතට වද දෙන බවත්, එම සොරකම්වලට දඬුවම් විඳ හිතට සහනයක් සැනසිල්ලක් ලබාගත යුතු නිසා පොලිසියට බාර වීමට තමන් තීරණය කළ බවත්, මේ සම්බන්ධයෙන් සිය මවට ද පවසා ඇයද සමඟ පොලිසියට පැමිණි බවයි මෙම භික්ෂුව පොලිසියට පවසා ඇත්තේ.