මගීන් 293ක් සමඟ ගුවන් යානයක් අනතුරට ලක්වෙයි..

හොංකොං හි මගී ගුවන් යානයක් ගුවන්ගත කිරීමට පෙර සිදුවු අනතුරකින් මගීන් 11දෙනෙකු තුවාල ලබා තිබෙනවා.

ගුවන් යානයේ රෝදයක් පුපුරායාමෙන් එම අනතුර සිදුව ඇති බව විදෙස් මාධ්‍ය වාර්තා කළා.

ඒ අනුව, මගීන් යානයෙන් ඉවතට ගැනීම සඳහා පුර්ව ආරක්ෂක ක්‍රම අනුගමනය කිරීමේ දී සිදුවු අනතුරෙන් එම මගීන් තුවාල ලබා ඇති බවයි වාර්තා වන්නේ.

තුවාල ලැබුවන්ගෙන් 09දෙනෙකු ප්‍රතිකාර ලබා රෝහල්වලින් පිටව ගොස් ඇති අතර ප්‍රතිකාර ලබන කිසිවෙකුගේ තත්ත්වය බරපතළ නොවන බවයි විදෙස් වාර්තා පැවසුවේ.

විදෙස් වාර්තා වැඩිදුරටත් සඳහන් කළේ, හොංකොං සිට ලොස් ඇන්ජලීස් බලා පියාසර කිරීමට නියමිතව තිබු මෙම ගුවන් යානයේ කාර්ය මණ්ඩල සාමාජිකයින් 17දෙනෙකු සහ මගීන් 293දෙනෙකු සිට ඇති බවයි.