ජනාධිපතිවරණය සඳහා ඇප තැබූ පුද්ගලයින් දස දෙනා මෙන්න - ජනපති මුලින්ම ඇප බැන්ද හේතුවත් හෙළිවෙයි..
2024 ජනාධිපතිවරණය සඳහා අපේක්ෂකයින් දහදෙනෙකු මේ දක්වා ඇප තබා ඇතැයි මැතිවරණ කොමිසම නිවේදනය කර තිබේ.
ඒ අනුව මේ දක්වා රනිල් වික්‍රමසිංහ, සරත් කීර්තිරත්න, ඕෂල හේරත්, ඒ. එස්. පී. ලියනගේ, සජිත් ප්‍රේමදාස, පී. ඩබ්. එස්. කේ. බණ්ඩාරනායක, විජේදාස රාජපක්ෂ, කේ.කේ. පියදාස, සිරිතුංග ජයසූරිය සහ අජන්ත ද සොයිසා යන අය විසින් ඇප මුදල් තැන්පත්කර ඇත.
මේ අතර, ජුලි (29) මොනරාගල පැවැති ගොවිජන සමුළුව අමතමින්, විපක්ෂනායක සජිත් ප්‍රේමදාස කියා සිටියේ, ජනාධිපතිවරයා මුලින්ම ඇප බැන්දේ උප්පරවැට්ටියකට බවත් ඔහු අපේක්ෂකයෙක් නිසා පොලිස්පති පත් කිරීම ජනාධිපතිවරයා සතු වගකීමක් බවත්ය.
පොලිස්පතිවරයා සම්බන්ධයෙන් ශ්‍රේෂ්ඨාධිකරණය තීන්දුවක් දුන් පසු කාටවත් ඒ ගැන කතා කරන්න හෝ සාකච්ඡා කරන්න නොහැකි බවත් අනුප්‍රාප්තික ජනාධිපතිවරයා සටකපට උප්පරවැට්ටි තුළින් තමන්ගේ ජනාධිපතිකම රැකගන්න උත්සාහ කරන බවත් කතානායකවරයාට විනිසුරුවන් සමඟ සාකච්ඡා කිරීම සදාචාරසම්පන්න නොමැති බවත් එහිදී විපක්ෂ නායකවරයා සඳහන් කළා.
අද රටේ ක්‍රියාත්මක වන්නේ සටකපට විනාශකාරී කෘර මෘග පාලනයක් බවත් මේ පාලනය තුළ ගොවියා ධිවරයා විනාශ කර ජනාතාව දුප්පත් කර මන්දපෝෂණය වැඩි කර ලක්ෂ 220 ජනතාව අනාථ කර මේ වන විට ජනතාව තමාට ඡන්දය දෙන එක වළක්වන්න ආණ්ඩුව විවිධ ඩීල් ගහන බව හෙතෙම කියා සිටියා.
සජිත්ට ඡන්දය දුන්නොත් ලක්ෂ 220 ජනතාව ආරක්ෂා කර හොරු අල්ලා හොරා කාපු මුදල් නැවත රටට පවරා ගන්නා නිසාත් රට බංකොලොත් කළ අයට අධිකරණය හමුවේ උත්තර බදින්නට සිදුවන නිසාත් මොවුන් බිය වී ඇති බවත් විපක්ෂ නායකවරයා පවසනවා.
මෙවර ජනාධිපතිවරණය සැප්තැම්බර් 21 වනදා පැවැත්වෙයි.
