බ්රිතාන්යයට එරෙහිව ඊශ්රායල අගමැති නෙතන්යාහු කළ කතාවෙන් ලෝකයම කැළඹෙයි
බ්රිතාන්යය “ඉස්ලාමීය ජනරජයක්” බවට පත්විය හැකි බවත්, එය න්යෂ්ටික අවි සහිත “පළමු ඉස්ලාමීය ජනරජය” විය හැකි බවත් ඊශ්රායල අග්රාමාත්ය බෙන්ජමින් නෙතන්යාහු කළ ප්රකාශයක් දැඩි ආන්දෝලනයකට තුඩු දී තිබේ.
නෙතන්යාහු මෙම අදහස් පළ කර ඇත්තේ අද (14) ඊශ්රායල හමුදා ගුවන්විදුලි වැඩසටහනකට එක්වෙමින් කළ සම්මුඛ සාකච්ඡාවකදීය.
ඊශ්රායලය සහ ඉරානය අතර න්යෂ්ටික අවි සම්බන්ධයෙන් පවතින ගැටුම පිළිබඳ අදහස් දක්වමින් සිටියදී, නෙතන්යාහු බ්රිතාන්යයේ වර්තමාන දේශපාලන හා සමාජ පරිසරය විවේචනය කරමින් මෙම ප්රකාශය සිදුකර තිබේ.
අතීතයේ බ්රිතාන්යයේ සිටි ඇතැම් දේශපාලනඥයන් සහ මාධ්ය චරිත ඊශ්රායලයට දැක්වූ සහයෝගය සිහිපත් කර ඇති නෙතන්යාහු, එවැනි ආකල්පයක් වර්තමාන බ්රිතාන්යයෙන් දැකගත නොහැකි බව සඳහන් කර ඇත.
බ්රිතාන්ය - ඊශ්රායල සබඳතාත් දැඩි පීඩනයක
නෙතන්යාහුගේ මෙම ප්රකාශය සිදුකර ඇත්තේ බ්රිතාන්යය සහ ඊශ්රායලය අතර රාජ්යතාන්ත්රික සබඳතා දැනටමත් දැඩි පීඩනයකට ලක්ව ඇති පසුබිමක වීම විශේෂත්වයකි.
විශේෂයෙන් ගාසා යුද්ධය, පලස්තීන රාජ්යය පිළිබඳ බ්රිතාන්යයේ ස්ථාවරය සහ ඊශ්රායල රජයට එරෙහිව පැනවිය හැකි සම්බාධක සම්බන්ධයෙන් දෙරට අතර මතභේද ඉහළ ගොස් තිබේ.
හිටපු බ්රිතාන්ය අග්රාමාත්ය කීර් ස්ටාර්මර්ගේ පාලන සමයේදී එක්සත් රාජධානිය ඊශ්රායලය සමඟ පැවති නිදහස් වෙළෙඳ සාකච්ඡා අත්හිටුවීමටත්, ඇතැම් ආයුධ අපනයන බලපත්ර අත්හිටුවීමටත් පියවර ගත්තේය.
එමෙන්ම, ප්රංශය සමඟ එක්ව එක්සත් රාජධානිය විසින් ඊශ්රායලයේ අන්ත දක්ෂිණාංශික කැබිනට් සාමාජිකයන් වන ඉටමාර් බෙන්-ග්විර් සහ බෙසලෙල් ස්මොට්රිච්ට එරෙහිව ද සම්බාධක පනවා තිබේ.
ඊශ්රායල විපක්ෂයෙන්ද විවේචන
ඊශ්රායල විපක්ෂ දේශපාලනඥ Avi Dabush ද නෙතන්යාහුගේ ප්රකාශය විවේචනය කර තිබේ.
ජාත්යන්තර වශයෙන් ඊශ්රායලය හුදකලා වෙමින් පවතින අවස්ථාවක, වැදගත් මිත්ර රටක් වන බ්රිතාන්යයට එරෙහිව මෙවැනි ප්රකාශ සිදුකිරීම රාජ්යතාන්ත්රික අසාර්ථකත්වයක් බව ඔහු චෝදනා කර ඇත.
කෙසේ වෙතත්, බ්රිතාන්යය “ඉස්ලාමීය ජනරජයක්” බවට පත්ව ඇති බවට නෙතන්යාහු කළ ප්රකාශය සනාථ කරන නිල සාක්ෂියක් නොමැත. එබැවින් එම ප්රකාශය බ්රිතාන්යයේ වර්තමාන දේශපාලන හා සමාජ තත්ත්වය පිළිබඳ නෙතන්යාහුගේ දේශපාලන මතයක් ලෙස සැලකිය හැකි බව විදෙස් මාධ්ය වාර්තා කරයි.
