නෙළුම් කුළුණ ගැන රටටම සුභ ආරංචියක්...

පසුගිය වසරේ සැප්තැම්බර් මාසයේදී කොළඹ නෙළුම් කුළුණ මහජනතාවට විවෘත කළ දින සිට මේ දක්වා මිලියනයකට ආසන්න ජනතාවක් එය නැරඹීමට පැමිණ ඇත.

සීමාසහිත Colombo Lotus Tower Management Company (Pvt.) Limited පැවසුවේ මේ වන විට පුද්ගලයින් 960,775 දෙනෙකු කුළුණ නැරඹීමට පැමිණ ඇති බවයි.

ඔවුන් අතර විදේශීය ජාතිකයන් 18,709 ක් වේ. සඳුදා සිට සිකුරාදා දක්වා පෙරවරු 9 සිට රාත්‍රී 9 දක්වා කුළුණ නැරඹීම සඳහා ප්‍රවේශපත්‍ර නිකුත් කෙරෙන අතර නරඹන්නන්ට රාත්‍රී 10 දක්වා රැඳී සිටීමට අවසර ලබා දෙන බව සමාගම සඳහන් කළේය.

සති අන්තයේ උදේ 9 සිට රාත්‍රී 10 දක්වා ප්‍රවේශපත්‍ර නිකුත් කෙරේ. සති අන්තයේ මහජනතාවට නෙළුම් කුළුණේ රාත්‍රී 11.00 දක්වා රැඳී සිටිය හැකි බව සමාගම වැඩිදුරටත් පවසයි.

සීමාසහිත Colombo Lotus Tower Management Company (Pvt.) Limited ද නෙළුම් කුළුණට හානි කරන පුද්ගලයින්ට එරෙහිව දැඩි නීතිමය ක්‍රියාමාර්ග ගන්නා බවට අනතුරු අඟවා තිබේ.

කුළුණ ආරක්ෂා කර ගැනීමට සහය වීම සාමාන්‍ය ජනතාවගේ යුතුකමක් බව සමාගම සඳහන් කළේය.

නෙළුම් කුළුණ කළමණාකරන සමාගම තහවුරු කළේ දේපළවලට හානි කළ පුද්ගලයන් කිහිප දෙනෙකු අත්අඩංගුවට ගෙන ඇති බවයි.

සමාගම පවසන්නේ දැනටමත් විශාල නඩත්තු පිරිවැයක් දැරීමට සිදුවී ඇති අතර අමුත්තන්ගෙන් සිදුවන හානි හේතුවෙන් වරින් වර වැඩි මුදලක් වෙන් කරන බවයි.