ඔබේ ව්‍යායාමය කඩාකප්පල් කළ හැකි යෝග්‍යතා වැරදි 15ක්.
ව්‍යායාම කියන්නේ කායික සහ මානසික නිරෝගී භාවය රැක ගන්න අත්‍යවශ්‍යම දෙයක්. busy life එකත් එක්ක ව්‍යායාම කරන්න ගොඩක් දෙනෙක්ට වෙලාවක් කලාවක් නැහැ. හිතුන හිතුන වෙලාවට කරනවනේ. ඒත් සාමාන්‍යයෙන් විශේෂඥයින් නම් නිර්දේශ කරන්නේ දිනකට අවම විනාඩි 30 ක් බැගින් සතියකට දින 5 ක් පමණ ව්‍යායාම කළොත් ඇති කියලයි. නමුත් සමහර වෙලාවට ඔබ ව්‍යායාම කරද්දී දැන හෝ නොදැන කරන ඇතැම් වැරදි නිසා ඔබට හානියක් වෙන්නත් පුළුවන් කියලා දැනගෙන හිටියද? ඒ නිසා ඔබ ව්‍යයාම කරද්දී මෙන්න මේ වැරදි ටික ඈත් කරන්න.
🏋️♂️ " අද ව්‍යායාම කරන්නේ නැහැ" යයි නිදහසට කාරණා තමන් විසින්ම ඉදිරිපත් කරමින්, ව්‍යායාම කිරීම කල් දැමීමෙන් හෝ මග හැරීමෙන් ඔබ ව්‍යායාම වලින් මෙතෙක් ලබාගත් ප්‍රගතිය අහිමි විය හැකියි.
🏋️♂️ ආහාර ගැනීමෙන් පැය දෙකකට පසු ව්‍යායාම කරන්න. ආහාර ජීර්ණය සඳහා රුධිර සැපයුම යොමුවී ඇති අවස්ථාවක ශරීරයේ අනෙකුත් කොටස්වලට රුධිර සැපයුම අඩු වන නිසා, ඔබේ කෙන්ඩා පෙරළීම හෝ මස් පිඬු වල අබාධ සිදු වෙන්න පුළුවන්. එමෙන්ම ව්‍යයාම කිරීමට පෙර කෙසෙල් ගෙඩියක් හෝ යෝගට් එකක් වැනි සැහැල්ලු ආහාරයක් ගන්න.
🏋️♂️ ශරීරය උණුසුම් කරන ව්‍යායාම වලින් තොරව ව්‍යායාම කිරීම ආරම්භ කිරීමෙන් වළකින්න. ශරීර උෂ්ණත්වය ඉහළ නංවා ගැනීම සහ මාංශ පේශි වලට රුධිරය ගලා යාම සැලැස්වීම සඳහා ඔබේ ශරීරය උණුසුම් කරගැනීම ඉතා වැදගත්. එමගින් මාංශ පේශි ලිහිල් කිරීම හා ඒවාට වැඩි චලනයක් ලබා දීමද සිදු වෙනවා. ඒ සඳහා විනාඩි 5-10 ක් සෙමෙන් එක තැන දිවීම හෝ අත් පා චලනය කිරීම වැනි සැහැල්ලු ව්‍යායාම කරන්න.
🏋️♂️ මාංශ පේශි ලිහිල් කරන (stretching) ව්‍යායාම කරන අතරතුර අනවශ්‍ය ශාරීරික චලන සිදු කිරීමෙන් මාංශ පේශි වලට හානි සිදුවීම හෝ ඒවා වඩාත් තද වීම් සිදු වෙන්න පුළුවන්. ඒ නිසා මාංශ පේශි ලිහිල් කරන (stretching) ව්‍යායාම කරන විට එකම ඉරියව්වකින් තත්පර 20 ක් 30ක් පමණ නොසෙල්වී සිටින්න.
🏋️♂️ ව්‍යායාම කිරීමේදී නිවැරැදි ඉරියව් ගැන ප්‍රවේශම් වන්න. උදාහරණයක් වශයෙන් ට්‍රෙඩ්මිල් (Treadmill) උපකරණ භාවිතා කිරීමේදී ට්‍රෙඩ්මිල් එක මත ඉදිරියට නැමී සිටීමෙන් වළකින්න. බර ඉසිලීමේදී කොන්ද කෙලින් තබාගෙන උරහිස් ලිහිල්ව පසුපසට වන්නට තබාගන්න. ඒ වගේම දණහිස් තද කරගෙන සිටීමෙන් වළකින්න.
🏋️♂️ ව්‍යායාම කිරීමේදී හුස්ම තද කරගෙන සිටීමෙන් ඔබේ ශරීරයට ඔක්සිජන් සැපයීම අඩාල වන අතර දිගු වෙලාවක් හුස්ම තද කරගෙන සිටීමෙන් ඔබ සිහිසුන් වීමටද පුළුවන්. ඒ අනුව බර ඉසිලීමේදී, පළමුව ගැඹුරු හුස්මක් ගෙන පසුව සෙමෙන් හුස්ම පිට කරන්න.
🏋️♂️ බර ඉසිලීමෙන් කරන ව්‍යායාම වලදී නිවැරදි බර භාවිතා කිරීමට ප්‍රවේශම් වන්න. වැඩි බරක් යොදා ගැනීමෙන් ශාරීරික හානි සිදුවීමට අමතරව, ඔබ එම බර යොදාගෙන කිරීමට සැලසුම් කල මුළු ව්‍යායාම මාලාවම කිරීමට නොහැකියි.
🏋️♂️ ව්‍යායාම කිරීම ආරම්භ කරනුයේ මෑතකදී නම්, සියළුම දේවල් එකවර කිරීමට උත්සාහ නොකරන්න. නැතිනම් ඔබේ මුළු ව්‍යායාම ක්‍රියාවලියම අඩපණ විය වෙන්න පුළුවන්. ව්‍යායාම කිරීම ආරම්භ කිරීමට පෙර, ඔබ ඉලක්ක කල යුතු මාංශ පේශි පද්ධතිය හඳුනාගන්න.
🏋️♂️ අනිත් අය සමඟ තරඟයට ව්‍යායාම නොකරන්න. කාලයක් ව්‍යායාම කල කෙනෙකු සමඟ ඔබව සංසන්දනය කරමින්, ඉක්මනින් එම පුද්ගලයා බවට පත්වීම අවශ්‍ය නැහැ, ඔබේ හැකියාවන් හඳුනාගෙන ඔබට ගැළපෙන දේ විතරක් කරන්න.
🏋️♂️ ජිම් එකක ව්‍යායාම කිරීමේදී, අනවශ්‍ය අන්දමින් සාමාජශීලී නොවන්න. එමඟින් ඔබේ අවධානය වෙනතක යොමුවී, ඔබේ මුළු ව්‍යායාම ක්‍රියාවලියම අපතේ යා හැක.
🏋️♂️ ඔබ කැමති ව්‍යායාම පමණක්ම නොකරන්න. ඔබට පහසු ව්‍යායාමයක් නිතරම කිරීමට ඔබ කැමති වුවත්, ශරීරයේ සෑම පේශි පද්ධතියකටම ව්‍යායාම අවශ්‍යයි. එම නිසා ශරීරයේ විවිධ කොටස්වලට හා විවිධ පේශි පද්ධතිවලට සමානව ඉලක්ක කර ව්‍යායාම කරන්න.
🏋️♂️ ඔබගේ ශරීරය සිසිල්ව තබාගැනීමට, හොඳින් රුධිරය සංසරණය සිදුවීමට සහ විජලනයට ලක්වීම වළක්වා ගැනීමට, ව්‍යායාම කිරීම ආරම්භ කිරීමට පෙර හා ව්‍යායාම කරන අතරතුරත් සෑම මිනිත්තු 15 කට වරක් හොඳින් වතුර බොන්න.
🏋️♂️ ව්‍යායාම කිරීම අවසන් කළ යුතු නිවැරැදි වේලාව මතක තබාගන්න. අවශ්‍ය ප්‍රමාණයට වඩා ව්‍යායාම කාලය දික් වීමෙන්, මාංශ පේශි වලට හානිවීම හා වෙනත් අතුරු අබාධ වලට ලක්විය හැකියි.
🏋️♂️ ව්‍යායාම කිරීම අවසන් කල පසු රුධිර පීඩනය, උෂ්ණත්වය, හෘද ස්පන්දනය නැවත නියමිත මට්ටමට ගෙන ඒමට, මාංශ පේශි ලිහිල් කරන (stretching) ව්‍යායාම නැවත මඳ වේලාවක් කරන්න.
ලෝකයේ කොහේ සිටියත් වැදගත් දේ ගැන විස්තර සවිස්තරාත්මකව දැන ගන්න එක් වෙන්න පුවත් WhatsApp සමඟ |
