කොස්තාපල්වරයාගේ පිස්තෝලයට මොකද උනේ..
Piyumika
in ශ්‍රී ලංකාවරාජකාරී සඳහා ලබා දී තිබූ පිස්තෝලය පොලිසියේ ඉදිරිපිට පිහිටා ඇති බුදු මැදුර තුළ සඟවා පසුව එම අවිය අස්ථානගත වූ බවට පැමිණිලි කළ පොලිස් කොස්තාපල්වරයකු සැකපිට අත්අඩංගුවට ගත් බව වැලිඔය පොලිසිය වාර්තා කරයි.
මෙලෙස අත්අඩංගුවට ගත් සැකකාර පොලිස් කොස්තාපල්වරයාගෙන් දීර්ඝ ලෙස ප්‍රශ්න කිරීමෙන් අනතුරුව හෙළිවූ තොරතුරු මත ඔහු විසින්ම බුදු මැදුරේ සඟවා තබන ලද එම පිස්තෝල අවියද සොයාගෙන ඇත.
අදාළ පොලිස් කොස්තාපල්වරයා පසුගිය තිස්එක් වෙනිදා වැලිඔය පොලිස් ස්ථානයේ දිවා කාලයේ උප සේවයේ යොදවා සිටි රාජකාරී සඳහා නිකුත් කර තිබූ පිස්තෝලය අස්ථානගත වී ඇති බවට පොලිස් ස්ථානාධිපතිවරයාට පැමිණිලි කර තිබිණි.
පොලිස් ස්ථානාධිපතිවරයාට මේ සම්බන්ධයෙන් ඇතිවූ සැකයක් මත ඔහුගෙන් දීර්ඝ ලෙස ප්‍රශ්න කිරීමේදී ඔහු විසින්ම සඟවා තිබූ එම අවිය සොයා ගැනීමට හැකි වී තිබේ.
මේ අනුව සැකකාර කොස්තාපල්වරයා මෙම පිස්තෝලය පිටස්තර අයෙකුට විකිණීම සඳහා රැගෙන යනතුරු බුදු මැදුරේ සඟවා තබන්නට ඇතැයි පොලිසිය සැක පහළ කරයි.
මෙම කොස්තාපල්වරයාගේ වැඩ තහනම් කිරීමට විනය පරීක්ෂණයක්ද ආරම්භ කර ඇති බව පොලිසිය පවසයි.
