විද්‍යුත් ත්‍රිරෝද රථ ලියාපදිංචියට තාර බර ප්‍රශ්නයක් වෙයි..
විද්‍යුත් ත්‍රිරෝද රථ ලියාපදිංචි කිරීමේදී එහි තාර බර සාමාන්‍ය ත්‍රිරෝද රථයක තාර බරට සාපේක්ෂව වැඩි බැවින් එය ත්‍රිරෝදරථ කාණ්ඩයේ ලියාපදිංචි කිරීමට ගැටලු මතුව ඇතැයි මෝටර් රථ ප්‍රවාහන දෙපාර්තුමේන්තුව සඳහන් කර සිටිනවා.
මෝටර් වාහන පනතේ අර්ථ නිරූපණය අනුව ත්‍රිරෝදරථයක් ලෙස ලියාපදිංචි කිරීමට එහි තාර බර කිලෝ ග්‍රෑම් 500ක් විය යුතු බවයි පැවසෙන්නේ.
විද්‍යුත් ත්‍රිරෝදරථ නිෂ්පාදනයේදී සහ පෙට්‍රල් හෝ ඩීසල් භාවිතයෙන් ධාවනය කරනු ලබන ත්‍රිරෝදරථයක් විදුලි බලයෙන් ධාවනය කිරීමට හැකිවන පරිදි පරිවර්තනය කිරීමේදී ඒ සඳහා විද්‍යුත් ආරෝපිත බැටරි භාවිත කරන අතර එවැනි ත්‍රිරෝදරථවල තාර බර කිලෝ ග්‍රෑම් 500 ඉක්මවන බවටයි හඳුනාගෙන ඇත්තේ.
ඒ හේතුවෙන් විදුලි බලයෙන් ධාවනය කළ හැකි ත්‍රිරෝදරථ ලියාපදිංචි කිරීමට නොහැකි තත්ත්වයක් නිර්මාණය වී ඇති බව වාර්තා වනවා.
මෙම ගැටලුව මගහරවා ගැනීමට විද්‍යුත් ත්‍රිරෝදරථවල තාර බර කිලෝ ග්‍රෑම් 600ක් වන ලෙස සංශෝධනය කර ලියාපදිංචිය සඳහා පවතින බාධාවන් ඉවත් කිරීමට තීරණයකර තිබෙන බවයි වාර්තා වන්නේ.
