අයිස් කනවද? අයිස් ගහනවද? ලොව අංක එකේ ප්‍රබලයාගේ ඇත්ත කතාව.
ලෝකය පුරා පැතිර තිබෙන ප්‍රබලම වෛරසය තමයි නීති විරෝධී මත්ද්‍රව්‍ය භාවිතය. මේ හේතුවෙන් රටක ආර්ථිකය, සමාජය යහපැවැත්ම, සෞඛ්‍ය පද්ධතිය, නීති පද්ධතිය සියල්ලම දැඩි පීඩනයකට ලක්වෙනවා. වැඩිපුරම ලොව පුරා ව්‍යාප්ත වන මත්ද්‍රව්‍ය අතර ජනප්‍රියම මත්ද්‍රව්‍ය වන්නේ හෙරොයින් සහ අයිස්. මීට කලින් අපි හෙරොයින් ගැන නම් කතා කළා. අද කතා කරන්න යන්නේ අයිස් ගැන.
හෙරොයින් පැත්තකින් තිබ්බොත් අයිස් හෙවත් ක්‍රිස්ටල් මෙත් (මෙතැම්ෆිටමීන්) තමයි ලොව අංක එකේ මත්ද්‍රව්‍ය. මේවායේ ක්‍රියාකාරීත්වය බලපාන්නේ මොළය සහ ශරීරය අතර පණිවුඩ හුවමාරුව වේගවත් කිරීමටයි. ඉතා බලවත් මත්ද්‍රව්‍යයක් වන මෙය වහා ඇබ්බැහි කරවන සුළුයි. ඒ වගේම ජීවිතයටද තර්ජනයක්.
අයිස් හෙවත් ක්‍රිස්ටල් මෙත්
🧊 මේ මත්ද්‍රව්‍යයේ ඉතිහාසය 1800 ගණන් දක්වා විහිදෙනවා.
🧊 1893 දි හොයාගනු ලැබූ මේ මෙතැම්ෆිටමීන් දෙවැනි ලෝක යුද්ධ කාලවලදී සොල්දාදුවන්ගේ ක්‍රියාශීලීත්වය වැඩි කරන උත්තේජකයක් හැටියටත් පාවිච්චි කරලා තියනවා.
🧊 අද වෙනකොට ඇමරිකා, රුසියා වගේ රටවල් වල මේකට පිරිමි වගේම කාන්තාවන්ද බහුල ලෙස ඇබ්බැහි වෙලා ඉන්නවා.
🧊 ක්‍රිස්ටල් මෙත් ශරීරගත කරගැනීමෙන් පසුව තාවකාලික සන්තෝෂයක්, ආත්ම විශ්වාසයක්, ශක්තිමත් සහ ප්‍රබෝධමත් හැඟීමක් ඇති වෙනවා.ඒ පොඩි පොඩි පොයින්ට් වලින් පටන් අරගෙන ඉතා කුඩාම කුඩා කාලෙකදි දත් වැටෙන්න ගන්න, එතැනින් පස්සේ ටිකේ ටික සිරුරට බරපතල හානි සිදු කරන අතර අවසානයේ මොළය මරණයට පත් කෙරෙනවා.
🧊 අයිස් සාමාන්‍යයෙන් පළිඟු හැඩැති කුඩා ස්ඵටික ආකාරයෙන් සුදු හෝ දුඹුරු පැහැති, තියුණු ගන්ධයක් සහිත කුඩක් ලෙස දකින්න ලැබෙනවා.
අයිස් මත්ද්‍රව්‍යය භාවිතයෙන් පොදුවේ ඉස්මතු වන ශාරීරික සහ හැසිරීම් වෙනස්කම්
📌️ සුළු වේලාවකට පවතින අසාමාන්‍ය සතුටක්, ආත්ම විශ්වාසයක් ඇතිවීම
📌️ ශරීරය කිතිකැවෙන, පොපියන ස්වභාවයක් දැනීම - ඇසේ කණීනිකාව විශාල වීම සහ මුඛය වියළීම
📌️ දත්මිටි කෑම සහ අධික ලෙස දහදිය දැමීම
📌️ හෘද ස්පන්දනය ඉහළ යාම සහ වේගවත් හුස්ම ගැනීම
📌️ ආහාර රුචිය අවම වීම
📌️ ලිංගික ආශාවන් ඉහළ යාම සහ නැඹුරුතාව ඉහළ යාම
📌️ එසේම අයිස් එන්නත් කටු භාවිතයෙන් ලබාගැනීම මඟින් පිටගැස්ම, වෙනත් ආසාදන බෝවීම හෝ රුධිර ශිරාවන්ට හානිවීම් වැනි ආබාධයන් ඇතිවිය හැකියි.
📌️ එන්නත් කටු හවුලේ භාවිතය මඟින් හෙපටයිටීස් B, හෙපටයිටීස් C, HIV වැනි රෝග ආසාදනය විය හැකි සම්භාවිතාවය වැඩි.
📌️ නාසය හරහා භාවිතා කිරීමේ දී නාස් කුහරය තුවාල වීම හරහා නාසයෙන් රුධිරය වහනය වීමේ අවදානමක් පවතින අතර එයින් සහ ආඝ්‍රානයෙන්, ශ්වසන පද්ධතියට හානි වීමට හැකියි.
අයිස් අධිමාත්‍රාවක් භාවිතා කිරීමෙන් ඇතිවන බලපෑම
📌️ අයිස් පමණක් නොවෙයි, ඕනෑම මත්ද්‍රව්‍යයක අධිමාත්‍රාවක් භාවිතයට ගැනීම මරණයෙන් කෙළවර විය හැකි හෝ සදාකාලික ශාරීරික ආබාධ ඇති කළ හැකියි.
📌️ හෘද ස්පන්දනය ඉහළ යාම සහ පපුවේ වේදනාව
📌️ හුස්ම ගැනීමේ අපහසුතා ඇති වීම
📌️ ශරීරය පාලනයකින් තොරව තදින් ගැස්සීම
📌️ අධික ලෙස ආවේගශීලී වීම, වික්ෂිප්ත ස්වභාවය සහ නොසංසුන් බව
📌️ හදිසියේ ඇතිවන හිසේ කැක්කුම
📌️ සිහිමූර්ඡා වීම
📌️ ආඝාතය
📌️ හෘදයාබාධ ඇතිවීම, හෝ මරණය සිදුවීම.
අයිස් දීර්ඝකාලීනව භාවිතා කිරීමේදී ඇති වන බරපතල සංකූලතා
📌️ අධික ලෙස ශරීරයේ බර අඩු වීම සහ ආහාර අරුචිය
📌️ ඒකාකාරී නින්දක් නොලැබීම
📌️ මුඛය වියළීම සහ දන්ත ගැටළු
📌️ දෛනික සෙම්ප්‍රතිශ්‍යාව හෝ උණ හට ගැනීම
📌️ හුස්ම ගැනීමේ පහසුතා ඇතිවීම
📌️ කාංසාව, පීඩනෝන්මාදය, සහ ප්‍රචණ්ඩකාරී බව
📌️ විශාදය ඇති වීම
📌️ හදවත් සහ වකුගඩු රෝග හට ගැනීම
📌️ ආඝාත තත්ත්වයක් ඇතිවීමේ අවධානම ඉහළ යාම
📌️ අයිස් මනෝවිකාරය ඇති වීම
📌️ මානසික රෝග ඇතිවීම
📌️ මරණය
