කොලොම්බියාව කම්පා කළ රික්ටර් 7.4ක මාරාන්තික භූමිකම්පාවෙන් 132ක් මරුට

රික්ටර් මාපකයේ ඒකක 7.4ක ප්‍රබලත්වයෙන් යුත් ප්‍රබල භූමිකම්පාවකින් කොලොම්බියාවේ පුද්ගලයන් අවම වශයෙන් 132 දෙනෙකු මියගොස් තවත් 570කට වැඩි පිරිසක් තුවාල ලබා තිබේ.

මෙය 21 වැනි සියවසේදී කොලොම්බියාවට බලපෑ ප්‍රබලතම භූමිකම්පාව ලෙස වාර්තා වන අතර, ගලවා ගැනීමේ මෙහෙයුම් තවදුරටත් ක්‍රියාත්මක බැවින් මරණ සංඛ්‍යාව තවදුරටත් ඉහළ යා හැකි බවට බලධාරීන් අනතුරු අඟවා ඇත.

භූමිකම්පාවේ කේන්ද්‍රස්ථානය San José del Palmar ප්‍රදේශය ආසන්නයේ පිහිටා ඇති අතර, බටහිර සහ මධ්‍යම කොලොම්බියාවේ නගර රැසකට එහි ප්‍රබල බලපෑම් එල්ල වී තිබේ. Cali, Pereira, Armenia සහ Manizales ඇතුළු නගරවල ගොඩනැගිලි සහ යටිතල පහසුකම් රැසකට සැලකිය යුතු හානි සිදුව ඇති බව වාර්තා වේ. මේ වනවිට නිවාස 1,575කට, සෞඛ්‍ය මධ්‍යස්ථාන 18කට සහ පාසල් 52කට හානි සිදුව ඇති බව බලධාරීන් සඳහන් කර තිබේ.

ගොඩනැගිලි කඩා වැටීමෙන් සුන්බුන් අතර සිරවී සිටින පුද්ගලයන් සොයා ගැනීම සහ ඔවුන් මුදා ගැනීම සඳහා ගලවා ගැනීමේ කණ්ඩායම් අඛණ්ඩව මෙහෙයුම්වල නිරතව සිටිති.

භූමිකම්පාවෙන් අනතුරුව පසුකම්පන රැසක් ද වාර්තා වී ඇති අතර, තවදුරටත් ගොඩනැගිලි කඩා වැටීම් සහ හානි සිදුවීමේ අවදානමක් පවතින බැවින් ජනතාවට අවධානයෙන් පසුවන ලෙස බලධාරීන් උපදෙස් ලබාදී තිබේ.