මීගොඩ කොල්ලයට හසු වූ ව්‍යාපාරිකයන් තොරතුරු එළියට. - (VIDEO)
Wayomi
in ශ්‍රී ලංකාවමීගොඩ ආර්ථික මධ්‍යස්ථානයේ සිදුවූ කොල්ලය සම්බන්ධයෙන් මේ වනවිට පුද්ගලයින් 5දෙනෙකු අත්අඩංගුවට ගෙන තිබෙනවා.
එලෙස අත්අඩංගුවට ගැනුණු තිදෙනෙක්ම ව්‍යාපාරිකයින් බවයි පොලිසිය කියා සිටියේ.
මේ අතර අදාළ කොල්ලයේ ඔත්තු බැලීමට හවුල් වූ බවට පොලිසිය අනාවරණ කරගැනීම හේතුවෙන් තිස්සමහාරාම ප්‍රදේශයේ ව්‍යාපාරිකයෙකු අත්අඩංගුවට ගැනුනා.
ඔහු තිස්සමහාරාම ප්‍රදේශයේ මිරිස් කුඩු ව්‍යාපාරයක් සහ කායවර්ධන මධ්‍යස්ථානයක් පවත්වාගෙන යන අයෙක්.
එමෙන්ම සිද්ධිය සම්බන්ධයෙන් ඉඹුල්ගම සහ කඩවත ප්‍රදේශවල පදිංචි ව්‍යාපාරිකයින් දෙදෙනෙකුද පොලීසිය විසින් අත්අඩංගුවට ගෙන ඇති අතර පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව ඒ සම්බන්ධයෙන් පැවසුවේ මෙලෙසින්,
"අපට පෙනී යනවා මේ සැකකරුවන් කිහිපදෙනා සංවිධානාත්මකව කොල්ලකෑම් සිදුකරන බවට. ඒ වගේම ඒවා නොපෙනෙන ආකාරයට, සමාජයට වසන් වෙන ආකාරයට ඔවුන් යම්කිසි ව්‍යාපාරවල යෙදෙමින්, මිරිස් මෝල් පවත්වාගෙන යමින් කායවර්ධන මධ්‍යස්ථාන පවත්වාගෙන යමින්, අවන්හල් පවත්වාගෙන යමින් යම්කිසි ආවරණයක් ලබාගැනීමට කටයුතු කරන බවත් පේනවා. ඒ වගේම මේ එක් සැකකරුවෙකුට කඩවත ප්‍රදේශයේ ඔන්ලයින් සාරි අලෙවි කරන ස්ථානයක් පවත්වාගෙන යන බවටත් තොරතුරු තියෙනවා. කෙසේ වෙතත් මේ සම්බන්ධයෙන් තවත් සැකකරුවන් කිහිපදෙනෙක් අත්අඩංගුවට ගැනීමට සිටිනවා. පොලිස් කණ්ඩායම් කිහිපයක් ඒ සම්බන්ධයෙන් මේ වනවිට ක්‍රියාත්මක වනවා. වෙඩික්කරු යම්කිසි ආරක්ෂක අංශයක කාලයක් සේවය කරලා තියෙනවා. ඔහු දැනට ඉවත්කරලා තියෙන පුද්ගලයෙක්. ඒ වගේම මොවුන්ට මේ අපරාධ කිරීම සඳහා ඒ ඒ ප්‍රදේශවල පුද්ගලයින් සිටින බවට දැනට තොරතුරු ලැබිලා තියෙනවා."
