සාමාන්‍ය පෙළ ලියූ සියලුම සිසුන් පේල් වෙච්ච පාසලක් ගැන අනාවරණයක්.
සාමාන්‍ය පෙළට ඉදිරිපත් වූ සියලුම සිසුන් අසමත් වූ පාසලක් ගැන කුරුණෑගල ප්‍රදේශයෙන් වාර්තා වෙනවා.
ඒ, අනුව එම පාසලේ සිසුන් 17දෙනකු සාමාන්‍ය පෙළට ඉදිරිපත් වී ඇති අතර කුරුණෑගල අධ්‍යාපන කලාපයේ මෙවැනි පාසලක් ඇති බව වයඹ පළාත් ආණ්ඩුකාර ලක්ෂ්මන් යාපා අබේවර්ධන ප්‍රකාශ කර සිටියා.
කුරුණෑගල මලියදේව බාලිකා විදුහලේ පසුගියදා පැවති කුරුණෑගල අධ්‍යාපන කලාපයේ විදුහල්පති ප්‍රගති සමාලෝචන රැස්වීමට සහභාගි වෙමින් ඔහු මේ බව සඳහන් කළා.
එමෙන්ම එම අධ්‍යාපන කලාපයේම සිසුන් සිවුදෙනකු විභාගයට ඉදිරිපත් වී ඔවුන් සියලුදෙනාම අසමත් වූ පාසලක්ද ඇති බවත් මෙම අවස්ථාවේදී එම පාසල්වල නම ප්‍රකාශ නොකරන බවත් ආණ්ඩුකාරවරයා ප්‍රකාශ කළා.
කෙසේ වෙතත් ඔහු වැඩි දුරටත් කියා සිටියේ, පහසුකම් සහිත කුරුණෑගල අධ්‍යාපන කලාපයේ පාසල් කීපයකම සිසුන් මෙලෙස විභාග අසමත් වී ඇති පසුබිමක මහව අධ්‍යාපන කලාපයේ වන අලි ගැවසෙන දුෂ්කර ප්‍රදේශයක පාසලක් වයඹ පළාතේ හොඳම ශිෂ්‍යත්ව ප්‍රතිඵල ලබාගෙන ඇති බවයි.
"මේක වෙන්න බැරි දෙයක්. සිසුන් හැමදෙනාම අසමත් වෙන්නෙ කොහොමද? අනික කුරුණෑගල කලාපයේ පාසල්. මෙහෙම වුණා කියලා පාසල් වහල දාන්න දෙන්න බැහැ. විදුහල්පතිවරයා තමයි මේ සඳහා නායකත්වය දෙන්න ඕනෑ. මම ආණ්ඩුකාරවරයා ලෙස වයඹ වැඩ භාර ගනිද්දි සාමාන්‍ය පෙළ ලංකාවේ 8 වැනි තැනට තිබුණේ. නමුත් මේ වන විට වයඹ 4වන තැනට ඇවිත් තිබෙනවා.
පාලකයෙක් දුර්වල උනොත් රටකට වගේම පාසලකටත් විනාශයක් සිදු වෙනවා. සහතික තිබුණාටම විදුහලක් කරන්න බෑ. කණ්ඩායම් හැඟීම, ඍජු තීරණ ගැනීම කියන මේ සියලුම අංශවලින් විදුහල්පතිවරයකු සන්නද්ධ වෙන්න ඕන."
