ටෙලිකොම් කුටිවල තියෙන රත්‍රං..මෘදුකාංග තැටි වලින් හමුවෙයි...

ටෙලිකොම් ග්‍රාහක කුටිවල (එම්සාන් පෙට්ටි‍යේ) අඩංගු තිබෙන විද්‍යුත් මෘදුකාංග තැටි සොරා ගැනීම පිටුපස එම තැටිවල අඩංගු රත්තරන් ගැනීමේ ජාවාරමක් ක්‍රියාත්මක වන්නේදැයි විශේෂ විමර්ශනයක් සිදුකර ඊට සම්බන්ධ සැකකරුවන් වහා අත්අඩංගුවට ගන්නා ලෙස බස්නාහිර පළාත් දකුණු අපරාධ කොට්ඨාසය වෙත උපදෙස් ලබා දුන් බව බස්නාහිර පළාත් භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා පවසනවා.

මේ වන විට දිවයිනේ විවිධ ප්‍රදේශවල ස්ථාපිත කර ඇති එම ග්‍රාහක කුටිවලින් රුපියල් කෝටි 13ක් පමණ වටිනා විද්‍යුත් මෘදුකාංග තැටි සියයකට අධික ප්‍රමාණයක් සොරාගෙන තිබෙන බවටයි වාර්තා වන්නේ.

ඒ අයුරින් ගනේමුල්ල, බොරැල්ල, මාලබේ, නවගමුව, අතුරුගිරිය, කොට්ටාව, හෝමාගම ආදී ප්‍රදේශවල ස්ථාපිත කර තිබෙන දුරකථන ග්‍රාහක කුටි 9 කින් එම මෘදුකාංග තැටි තොගය සොරා ගෙන තිබු අතර නවගමුවේ පමණක් දුරකථන ග්‍රහක කුටි තුනකින් විද්‍යුත් මෘදුකාංග තැටි සොරා ගෙන තිබෙන බවයි පැවසෙන්නේ.

ඉකුත් 25 වෙනි දින අවසන් වරට කොට්ටාව ලියනගොඩ ප්‍රදේශයේ දුරකථන ග්‍රාහක කුටියකින් විද්‍යුත් මෘදුකාංග තැටි 15 ක් සොරා ගෙන තිබිණි.

මෙම සොරකම් හේතුවෙන් දුරකථන පරිශීලකයන්, වයිෆයි, පියෝ ටීවී ඇතුළු එම දුරකථන ග්‍රාහක කුටියේ අඩංගු කර තිබෙන විද්‍යුත් මෘදුකාංග තැටි හරහා සේවය ලබාගත් පාරිභෝගිකයන් ලක්ෂ ගණනාවක් දැඩි අපහසුතාවයට පත්ව ඇති බව වාර්තා වේ.

ඒ සම්බන්ධයෙන් රජයට සිදුවන විශාල පාඩුව පිළිබඳ විශේෂ අවධානය යොමු කළ බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පතිවරයා බස්නාහිර පළාත් දකුණු දිසාව අපරාධ කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරී ලලිත් අබේසේකරට උපදෙස් ලබාදෙමින් කඩිනමින් සැකකරුවන් අත්අඩංගුවට ගැනීමට කටයුතු කරන ලෙස උපදෙස් ලබා දී ඇත.

අදාළ විද්‍යුත් මෘදුකාංග තැටි නිෂ්පාදනය කිරීමේ දී එක් මෘදුකාංග තැටියකට රත්තරන් ග්‍රෑම් 10ක පමණ ප්‍රමාණයක් අඩංගු කරන බවත් එයට හේතුව සන්නිවේදන කටයුතු වේගවත් කිරීමට බව ටෙලිකොම් ආයතනයේ ඉංජිනේරුවන් ලබාදුන් වාර්තාවක සඳහන් වන බව උසස් පොලිස් නිලධාරියෙක් වැඩි දුරටත් කියා සිටියා.

මෙම මෘදුකාංග තැටිවල රත්තරන් අඩංගු බවට දැනීමක් ඇත්තේ එම ක්ෂේත්‍රයේම අයෙකුට පමණක් බවත් ටෙලිකොම් ආයතනයේ ඉංජිනේරුවරයෙක් පැවසීය.

නමුත් එම රත්තරන් මෙරට දී උණුකර හෝ ලබාගත නොහැකි බවත් අනිවාර්යෙන් විදේශ රටක සහායක් බලා ගත යුතු බවද එම ඉංජිනේරුවරයා වැඩිදුරටත් කියා සිටියා.