පාසලක් අසලින් විසිකර ගිය අභිරහස් මළසිරුරක් හමුවෙයි..

ගිරාඳුරුකෝට්ටේ ප්‍රදේශයේ මහියංගනය-දෙහිඅත්තකණ්ඩිය ප්‍රධාන මාර්ගය අසළ තිබී අලුත උපන් බිළිඳු මළ සිරුරක් සොයාගෙන ඇති බව වාර්තා වනවා.

මාර්ගයේ ගමන්කළ අයෙකු මළ සිරුර දැක පොලීසිය දැනුවත් කිරීමට පියවර ගැනීමෙන් පසුවයි මේ පිළිබඳව තොරතුරු වාර්තාවී ඇත්තේ.

අනතුරුව එම ස්ථානයට පැමිණි ගිරාඳුරුකෝට්ටේ පොලිස් ස්ථානයේ නිලධාරීන් සිද්ධිය සම්බන්ධයෙන් වැඩිදුර විමර්ශනයක් ආරම්භ කර ඇත.

මළ සිරුර සොයාගන්නා විටත් එය නරක් වී තිබී ඇති අතර, කිසියම් පුද්ගලයෙකු එම ස්ථානයට මළ සිරුර විසිකර දමා පළායන්නට ඇති බවටයි පොලීසිය සැකපළ කරන්නේ.

මළ සිරුර සොයාගත් ස්ථානය ආසන්නයේ පාසලක් සහ බස් හෝල්ට් එකක් ද ඇති අතර ඒ ආසන්නයේ තිබී කළු පැහැති ගමන් මල්ලක් ද සොයාගෙන ඇතැයි වාර්තා වේ.

ගිරාඳුරුකෝට්ටේ පොලීසිය වැඩිදුර විමර්ශන ආරම්භ කළ ද සිද්ධිය සම්බන්ධයෙන් මෙතෙක් නිශ්චිත තොරතුරක් අනාවරණය වී නොමැති බවයි පැවසෙන්නේ.