මීගමුව බන්ධනාගාරයේ නොසන්සුන්තාවයෙන් 27ක් මරුට - විශේෂ විමර්ශන ඇරඹේ
මීගමුව බන්ධනාගාරය තුළ පෙරේදා (05) සහ ඊයේ (06) දෙදින පුරා ඇති වූ බිහිසුණු ප්රචණ්ඩකාරී නොසන්සුන්තාවයෙන් බන්ධනාගාර ජේලර්වරයෙකු ඇතුළු නිලධාරීන් 07 දෙනෙකු සහ රැඳවියන් 20 දෙනෙකු මිය ගිය බව තහවුරු වේ.
මෙම ඛේදවාචකයෙන් මියගිය පිරිසගේ පශ්චාත් මරණ පරීක්ෂණ කටයුතු කඩිනමින් සිදුකිරීම සඳහා අධිකරණ වෛද්ය නිලධාරීන් (JMO) 05 දෙනෙකුගෙන් යුත් විශේෂ වෛද්ය කණ්ඩායමක් පත් කර ඇති බව මීගමුව රෝහල් ආරංචි මාර්ග සඳහන් කළේය.
බන්ධනාගාර මාධ්ය ප්රකාශක, බන්ධනාගාර කොමසාරිස් ඒ.සී. ගජනායක මහතා ප්රකාශ කළේ ඊයේ උදෑසන බන්ධනාගාර නිලධාරීන් විසින් රැඳවියන්ට උදෑසන ආහාරය ලබා දීමට ගිය අවස්ථාවේදී මෙම දෙවැනි ගැටුම හටගත් බවයි.
එහිදී නිලධාරීන් එය පාලනය කිරීමට සහ එතැනින් පිටතට පැමිණීමට උත්සාහ කළ ද රැඳවියන් ඔවුන්ට අමානුෂික ලෙස පහර දී තිබේ.
පසුව රැඳවියන් බන්ධනාගාරයේ ප්රධාන පිවිසුම් දොරටුව ද කැඩීමට උත්සාහ කිරීමත් සමඟ තත්ත්වය අතිශය උණුසුම් වූ අතර, එය වැළැක්වීමට යාමේදී ගැටුම මහා ලේ වැගිරීමක් දක්වා වර්ධනය විය.
පවතින තත්ත්වය පාලනය කිරීම සඳහා යුද හමුදාව, පොලිස් විශේෂ කාර්ය බලකාය (STF) සහ කැරළි මර්දන ඒකකය වහාම බන්ධනාගාර පරිශ්රයට කැඳවූ අතර, පොලීසිය විසින් අහසට වෙඩි ප්රහාර කිහිපයක් ද එල්ල කළේය.
බස්නාහිර පළාත භාර ජ්යෙෂ්ඨ නියෝජ්ය පොලිස්පති සජීව මැදිවත්ත මහතා සඳහන් කළේ ආරක්ෂාව වෙනුවෙන් පොලිස් කණ්ඩායම් 10ක් සහ බන්ධනාගාරය වටා යුද හමුදා ආරක්ෂාව යෙදවූ බවයි.
මේ වන විට තත්ත්වය සම්පූර්ණයෙන්ම පාලනය කර ඇති අතර, ආරක්ෂක පියවරක් ලෙස රැඳවියන් 700කට වැඩි පිරිසක් වෙනත් බන්ධනාගාර වෙත මාරු කර යවා තිබේ.
මෙම ගැටුමෙන් සියයකට අධික පිරිසක් තුවාල ලබා ඇති අතර, අසාධ්ය තත්ත්වයේ පසු වූ බන්ධනාගාර නිලධාරීන් සිව්දෙනෙකු කොළඹ ජාතික රෝහලටත්, තවත් 18 දෙනෙකු වැඩිදුර ප්රතිකාර සඳහා වැලිසර, රාගම සහ ගම්පහ රෝහල් වෙතත් මාරු කර යවා ඇත.
මේ අතර, අධිකරණ සහ ජාතික ඒකාබද්ධතා අමාත්ය හර්ෂණ නානායක්කාර මහතා ඊයේ රාත්රියේම බන්ධනාගාරයේ තත්ත්වය නිරීක්ෂණය කිරීමට පැමිණි අතර, මීගමුව මහේස්ත්රාත්වරයා අද (07) දින ස්ථානීය පරීක්ෂණයක් සඳහා බන්ධනාගාර පරිශ්රය වෙත පැමිණීමට නියමිතය.
රජයේ ප්රවෘත්ති දෙපාර්තමේන්තුව නිවේදනය කළේ මෙම සිද්ධිය පිළිබඳව සොයා බලා වාර්තා කිරීමට විශ්රාමික ශ්රේෂ්ඨාධිකරණ විනිසුරු ප්රියන්ත ප්රනාන්දු මහතාගේ සභාපතිත්වයෙන් යුත් විශේෂ කමිටුවක් පත් කිරීමට අමාත්ය මණ්ඩල අනුමැතිය හිමි වූ බවයි.
අධිකරණ අමාත්ය හර්ෂණ නානායක්කාර මහතා ප්රකාශ කළේ මේ පිළිබඳ සවිස්තරාත්මක වාර්තාවක් අද දිනයේ පාර්ලිමේන්තුවට ඉදිරිපත් කරන බවයි. මේ අතර, මෙම බන්ධනාගාර සිදුවීම සම්බන්ධයෙන් පාර්ලිමේන්තුව තුළ ගතයුතු ක්රියාමාර්ග පිළිබඳව සාකච්ඡා කිරීම සඳහා අද උදෑසන සමගි ජනබලවේගයේ මන්ත්රීවරුන් අතර විශේෂ සාකච්ඡාවක් පැවැත්වෙන බව පාර්ලිමේන්තු මන්ත්රී ගයන්ත කරුණාතිලක මහතා වැඩිදුරටත් සඳහන් කළේය.
