ඊශ්‍රායලයෙන් 250 දෙනෙකු පිටවෙයි
එක්සත් ජනපදය පවසන පරිදි, ඔවුන්ගේ පුරවැසියන් 250 දෙනෙකු සහ ඔවුන්ගේ ආසන්නතම පවුලේ සාමාජිකයන් ඊශ්‍රායලයෙන් ඉවත් කර ඇත.
විදෙස් මාධ්‍ය වාර්තාවලට අනුව, ඇමරිකානු පුරවැසියන්, ස්ථිර පදිංචිකරුවන් සහ ඔවුන්ගේ ආසන්නතම පවුලේ සාමාජිකයන් ඇතුළු පුද්ගලයින් 250කට ආසන්න පිරිසක් ගුවන් ගමන් 07ක් හරහා ඊශ්‍රායලයෙන් පිටත්ව යෑමට එක්සත් ජනපද රජය සහාය වී ඇත.
මෙම ගුවන් ගමන් ඇතන්ස්, රෝමය සහ සයිප්‍රසයේ ලාර්නාකා ඇතුළු යුරෝපීය ගමනාන්ත කිහිපයකට ගොඩබස්වා ඇති බව විදෙස් මාධ්‍ය වාර්තා කර ඇත.
මැදපෙරදිග කලාපයේ උත්සන්න වන ආතතීන්ට ප්‍රතිචාර වශයෙන් මෙම ඉවත් කිරීමේ මෙහෙයුම් සිදු කර ඇති බව වාර්තා වේ.
එක්සත් ජනපද රජය පසුගිය සති අන්තයේ ඉරානයේ න්‍යෂ්ටික මධ්‍යස්ථානවලට ප්‍රහාරයක් එල්ල කළ අතර, එයට ප්‍රතිචාර වශයෙන් ඉරානය විසින් සඳුදා දින කටාර්හි පිහිටි එක්සත් ජනපද කඳවුරකට පළිගැනීමේ ප්‍රහාරයක් එල්ල කර ඇත.
