2023 උසස් පෙළ විභාගය ගැන දැනුම්දීමක්..
අධ්‍යාපන අමාත්‍ය සුසිල් ප්‍රේම්ජයන්ත් අද (07) පාර්ලිමේන්තුවේ දී අවධාරණය කළේ 2023 වර්ෂයට අදාළ උසස් පෙළ විභාගය මෙම වර්ෂාවසානයට පෙර පවත්වන බවය.
අමාත්‍යවරයා වැඩිදුරටත් සදහන් කළේ, මේ වන විට උසස් පෙළ උත්තර පත්‍ර සමීක්ෂණයේ අවසන් අදියරට පැමිණ සිටින අතර, එය අවසන් වූ වහා ම සාමාන්‍ය පෙළ උත්තර පත්‍ර සමීක්ෂණය ආරම්භ කරන බවයි.
එමෙන්ම, දෙසැම්බර් මස පැවැත්වීමට නියමිත සාමාන්‍ය පෙළ විභාගය 2024 වර්ෂයේ මුල් කාර්තුවේ පැවැත්වීමට කටයුතු යොදා ඇති බව ද අධ්‍යාපන අමාත්‍ය ආචාර්ය සුසිල් ප්‍රේමජයන්ත් මහතා සඳහන් කරයි.
විභාග සංවිධාන කටයුතු විභාග දෙපාර්තමේන්තුව විසින් නියමිත පරිදි සිදු කරන අතර, සාමාන්‍ය පෙළ ඇතුළු වෙනත් විභාග අපේක්ෂකයන්ගේ තොරතුරු බාහිර පාර්ශ්වයකට ලබා දීම අත්හිටුවන ලෙස සියලු ම පළාත් හා කලාප කාර්යාලවලට දන්වන බවත් අමාත්‍යවරයා මෙහි දී පැවසී ය.
පාර්ලිමේන්තුවේ දී මේ සම්බන්ධ ව වැඩිදුරටත් අදහස් දක්වමින් අමාත්‍යවරයා කියා සිටියේ, සිසුන්ට වෘත්තීය පුහුණුව ලබා දීමේ වැඩසටහන් සංවිධානය කරගැනීම වෙනත් බාහිර පාර්ශ්වයක මැදිහත්වීමක් නොමැති ව අධ්‍යාපන අමාත්‍යාංශය යටතේ පවතින ආයතන සමඟ එක් ව අධ්‍යාපන අමාත්‍යාංශයට පාසල් පද්ධතිය තුළ දී ම ස්වාධීන ව සිදු කරගත හැකි බව ය.
