කොළඹ ප්‍රසිද්ධ බාලිකා පාසලකට කඩා පැන්න රාජකීයයන්. - උණුසුම් තත්වයක්. - (VIDEO)
Wayomi
in ශ්‍රී ලංකාවඅද (04) කොළඹ 07 මියුසියස් විද්‍යාලයේ ගේට්ටුව බිඳ එම විද්‍යාලයට ඇතුළු වූ කොළඹ රාජකීය විදුහලේ සිසුන් පිරිසක් විද්‍යාල පරිශ්‍රයේදී අනවසර සන්දර්ශනයක් සිදු කරනු ලැබුවා.
කොළඹ රාජකීය හා ගල්කිස්ස සාන්ත තෝමස් විද්‍යාලය අතර පවතින වාර්ෂික ක්‍රිකට් ගැටුම හා රාජකීය විද්‍යාලයේ නිවාසාන්තර ක්‍රීඩා උත්සවය හේතුවෙන් රාජකීය සිසුන් අද පුහුණුවීම්වලට යොදවා තිබුනා.
ඒ, අනුව එලෙස පුහුණුවීම් සඳහා එක්වූ සිසුන් පන්සියයකට වැඩි පිරිසක් අද දහවල් කොළඹ බාන්ස් පෙදෙසේ පිහිටි මියුසියස් බාලිකා විද්‍යාලයට ඇතුළු වීමට උත්සාහ දරා ඇත.
එම අවස්ථාවේදී මියුසියස් විද්‍යාලයේ විදුහල්පතිනිය කළ දැනුම්දීම මත කුරුඳුවත්ත පොලිසියද විද්‍යාලයේ ආරක්ෂාවට යොදවනු ලැබුවා.
මෙම සිසුන් අවස්ථා කිහිපයකදීම පොලිසිය හා ගැටී මියුසියස් විද්‍යාලයේ තාප්පයෙන් පැනීමටත්, ගේට්ටුව තල්ලු කිරීමටත් උත්සාහ දැරූ අතර, පොලිසිය විසින් දැඩි පරිශ්‍රමයක් යොදා එම තත්ත්වය පාලනය කරගෙන ඇති බවයි වාර්තා වන්නේ.
එලෙස විද්‍යාලයේ ඉදිරිපිටට එක් රොක්වී සිසුන් පොලිස් බාධකයද නොතකා විද්‍යාලයේ තාප්පය හා ගේට්ටුව අසලට පැමිණ තිබුණු අතර සිසුන් කිහිපදෙනකු තාප්පයෙන් විදුහලට ඇතුළු වී විදුහලේ ගේට්ටුව විවර කර තිබෙනවා.
අනතුරුව සියලුම රාජකීය සිසුන් මියුසියස් බාලිකා විදුහලේ පිහිනුම් තටාකය අසලට රොක් වී රාජකීයන්ගේ නාමය උස් හඬින් ආමන්ත්‍රණය කරමින් විසිර ගොස් ඇති අතර අවස්ථාවේ මියුසියස් විදුහලේ ගුරුවරියන් සහ සිසුවියන්ද අත්පොළසන් නගා ඇත.
එමෙන්ම පොලිසිය රාජකාරි කරමින් සිටින අතරතුර ප්‍රබල ඇමැතිවරයකුගේ පුතකු කුරුඳුවත්ත වැඩබලන ස්ථානාධිපතිවරයාට පියාගෙන් ඇමැතුමක් යැයි කියමින් දුරකතනය ලබාදීමට උත්සාහ කළ අතර ස්ථානාධිපතිවරයා එම දුරකතනය ලබාගැනීම ප්‍රතික්ෂේප කළ බව ද වාර්තා වෙනවා.
