තනතුරු භාරගත් නිදහස් පක්ෂයේ සාමාජිකයන් ගැන හිටපු ජනපතිගෙන් දැඩි තීරණයක්..!

රජයේ අමාත්‍ය තනතුරු ලබා ගන්නා ශ්‍රී ලංකා නිදහස් පක්ෂයේ මන්ත්‍රීවරුන් පක්ෂයේ දරණ සියලු තනතුරුවලින් ඉවත් කරන බව එම පක්ෂයේ සභාපති හිටපු ජනාධිපති මෛත්‍රීපාල සිරිසේන පවසනවා.

නිවේදනයක් නිකුත් කරමින් ඔහු පෙන්වා දෙන්නේ ශ්‍රී ලංකා නිදහස් පක්ෂයේ අවසන් මධ්‍යම කාරක සභාවේදී තීරණය වූයේ පාර්ලිමේන්තුව තුල විපක්ෂයේ සිටිමින් රජය මහජනතාව වෙනුවෙන් ගනු ලබන යහපත් තීරණ සඳහා පමණක් පක්ෂයක් ලෙස සහය දක්වන බවයි.

එම තීරණයට පටහැනිව රජයේ අමාත්‍ය ධුරයක් ලබා ගන්නා යම් මන්ත්‍රීවරයෙකු වේ නම් ඔහු ශ්‍රී ලංකා නිදහස් පක්ෂය තුල දරන සියලුම තනතුරු වලින් ඉවත් කළ යුතු යැයි මධ්‍යම කාරක සභාවේ ඒකමතික තීරණය වූ බව ද ශ්‍රී ලංකා නිදහස් පක්ෂයේ සභාපතිවරයා අදාළ නිවේදනයෙන් පෙන්වා දුන්නා.