නිරාජ් චොප්රා පරදවා රුමේෂ් තරංගට ලෝසාන්හි විශිෂ්ට ජයක්

ස්විට්සර්ලන්තයේ පැවති ලෝසාන් ඩයමන්ඩ් ලීග් තරගාවලියේ පිරිමි හෙල්ල විසි කිරීමේ ඉසව්ව ජයගැනීමට ශ්‍රී ලංකාවේ රුමේෂ් තරංග පතිරාජ සමත් විය.

එහිදී මීටර් 88.14ක දුරක් වාර්තා කරමින් පතිරාජ මෙම ජයග්‍රහණය හිමිකරගත් අතර, ඔහු සහ ඉන්දියාවේ ඔලිම්පික් ශූර නිරාජ් චොප්රා අතර පැවතියේ ඉතා තියුණු තරගයකි.

චොප්රා මීටර් 88.05ක දුරක් වාර්තා කරමින් දෙවැනි ස්ථානයට පත්වූ අතර, පතිරාජ ඔහු පරදවා ඇත්තේ සෙන්ටිමීටර් 9ක ඉතා සුළු පරතරයකිනි. චොප්රාගේ එම දක්ෂතාව ඔහුගේ 2026 තරග වාරයේ හොඳම දක්ෂතාව ලෙසද සටහන් විය.

මීටර් 86.69ක දුරක් වාර්තා කළ ග්‍රෙනාඩාහි ඇන්ඩර්සන් පීටර්ස් තෙවැනි ස්ථානය හිමිකර ගත්තේය.

පතිරාජගේ මෙම ජයග්‍රහණය ඔහුගේ සාර්ථක 2026 තරග වාරයට තවත් වැදගත් ජයග්‍රහණයක් එක් කරයි. ඔහු මීට පෙර රෝමය සහ දෝහාහි පැවති ඩයමන්ඩ් ලීග් තරගවලදීද ජයග්‍රහණ වාර්තා කර තිබේ.

එමෙන්ම මෙම වසර මුලදී මීටර් 92.62ක දුරක් වාර්තා කරමින් ලොව හොඳම දක්ෂතාව මෙන්ම සිය පෞද්ගලික හොඳම දක්ෂතාවද සටහන් කිරීමට රුමේෂ් තරංග පතිරාජ සමත් විය.

ලෝසාන්හිදී ලැබූ මෙම ජයග්‍රහණයත් සමඟ ජාත්‍යන්තර මට්ටමේ ශ්‍රී ලංකා හෙල්ල විසි කිරීමේ ක්‍රීඩාවට තවත් සුවිශේෂී ජයග්‍රහණයක් එක් වී තිබේ.