පාසල් සිසුන්ට ජනාධිපති මාධ්‍ය අංශයෙන් දැනුම්දීමක් මෙන්න.. (PHOTO)
krishani
in ශ්‍රී ලංකාවපාසල් සිසුන්ට විවිධ මාධ්‍ය භාවිතයන් පිළිබඳ ප්‍රායෝගික දැනුම හා අත්දැකීම් ලබා දීමේ අරමුණින් ජනාධිපති මාධ්‍ය අංශය මගින් ක්‍රියාත්මක කරන "Kaleidoscope 2024 Screen media for Gen-Z" මාධ්‍ය වැඩසටහන අද (20) ශ්‍රී ලංකා සංවර්ධන පරිපාලන ආයතනයේ දී ආරම්භ කෙරිණි.
ජනාධිපති ලේකම් කාර්යාලය, අධ්‍යාපන අමාත්‍යංශය, ජනාධිපති මාධ්‍ය අංශය, රාජ්‍ය හා පෞද්ගලික මාධ්‍ය ආයතන, විද්වතුන්, මාධ්‍ය ක්ෂේත්‍රයේ ප්‍රවීණයන් ඇතුළු නියෝජිතයන්ගෙන් සමන්විත උපදේශන මණ්ඩලයක් සමඟ එක්ව මෙම වැඩසටහන ක්‍රියාත්මක කරනු ලබයි.
මෙහි පළමු අදියර සඳහා සක්‍රීය මාධ්‍ය ඒකක සහිත පාසල් 31කින් සිසුන් 158 ක් තෝරාගෙන ඇති අතර, සතියකට එක් දිනය බැගින් සති 16ක වැඩසටහනක් ලෙස මෙය ක්‍රියාත්මක කෙරේ.
වැඩසටහන ආරම්භ කරමින් එහි පළමු අදියර ලෙස මාධ්‍ය පසුබිම පිළිබඳ පාසල් දරුවන් දැනුවත් කිරීම ජනාධිපති ජ්‍යෙෂ්ඨ සහකාර ලේකම් සුධීර නිලංග විතාන, ජනාධිපති මාධ්‍ය අංශයේ අධ්‍යක්ෂවරුන් වන විශේෂඥ ඉංජිනේරු ස්ටැන්ලි හෙට්ටිආරච්චි සහ නදිරා මඩුගල්ල යන මහත්ම මහත්මින් විසින් සිදු කරන ලදී.
එමෙන්ම ප්‍රවීණ මාධ්‍යවේදී උදම් සතරසිංහ, ප්‍රවීණ කලාකරු සුදත් දේවප්‍රිය, ජාතික අධ්‍යාපන ආයතනයේ මාධ්‍ය අංශයේ හිටපු ප්‍රධානි බන්දුල පී. දයාරත්න යන මහත්වරු සම්පත් දායකයන් ලෙස විශේෂ දේශන පැවැත්වූහ.
මෙම වැඩසටහනේ දෙවන අදියර යටතේ කුසලතා දක්වන ක්ෂේත්‍ර 05ක් ඔස්සේ සිසුන්ට දින 06ක වැඩිදුර අධ්‍යාපනයක් ලබා දීම සිදු කෙරෙන අතර විද්වත් ආචාර්යවරුන් සහ ක්ෂේත්‍රයේ ප්‍රවීණයන් විසින් එය මෙහෙයවනු ලබයි.
මෙරට සියලු විද්‍යුත් මාධ්‍ය ආයතන ද මෙම වැඩසටහන සමඟ අත්වැල් බැඳගෙන සිටින අතර වැඩසටහනට එක්ව සිටින සිසුන්ට එම මාධ්‍ය ආයතන වලට ගොස් දින දෙකක කාලයක් එහි ප්‍රායෝගික දැනුම ලබා ගැනීමට ද අවස්ථාව සලසා තිබේ.
ඕනෑම මාධ්‍යවේදියෙකු තමන්ගේ සන්නාමය සහ අළෙවිකරණය පිළිබඳ අවබෝධයක් ලැබිය යුතු හෙයින් ඒ සම්බන්ධයෙන් පෞද්ගලික අංශයේ ඉහළම අත්දැකීම් ඇති ආයතන පරිශ්‍ර තුළ එම අත්දැකීම ලබා ගැනීමට අවස්ථාව සලසා ඇති අතර අද පවතින ලෝකයට පමණක් නොව නව්‍යතාව සමඟ අනාගත ලෝකයට අවශ්‍ය ප්‍රායෝගික දැනුම ද මෙම වැඩසටහන මඟින් සිසු දරුවන්ට ලබා දීමට නියමිතය.
