වාර්තා අතරට එක් වෙමින් මල්ෂාගෙන් ලකුණු 2කට කඩුලු 4ක්

ජාත්‍යන්තර පන්දුවාර විස්සයි 20 තරගයක ශ්‍රී ලංකා ක්‍රීඩිකාවක් වාර්තා කළ හොඳම පන්දුයැවීම වාර්තා කිරීමට මල්ෂා ශෙහානි අද (08) සමත් වූවාය. ඒ ආසියානු කුසලාන කාන්තා විස්සයි 20 තරගාවලියේ මැලේසියාවට එරෙහිව අද පැවති තරගයේදී ලකුණු 2කට කඩුලු 4ක් දවා ගනිමිනි.

මෙම තරගයෙන් ලකුණු 72ක ජයක් වාර්තා කළේද ශ්‍රී ලංකා කාන්තා කණ්ඩායමය. මෙවර තරගාවලියේ ශ්‍රී ලංකා කාන්තා කණ්ඩායම සහභාගී වූ සිව්වන තරගය මෙයයි.

ඒ අනුව ශ්‍රී ලංකා කාන්තා කණ්ඩායම නියමිත පන්දුවාර 20 අවසානයේදී කඩුලු 7ක් දැවී ලකුණු 105ක් රැස් කිරීමට සමත්වුණි. ලකුණු 106ක ජයග්‍රාහී ඉලක්කයක් හඹායාමට පිටියට පිවිසි මැලේසියා කාන්තා කණ්ඩායම ලකුණු 33කට සීමා කිරීමට ශ්‍රී ලංකා පන්දුයවන්නියන් සමත්වුණි.

එය වාර්තා අතරට එක් වූයේ ආසියානු කුසලාන කාන්තා තරගාවලියක කණ්ඩායමක් රැස් කළ අඩුම ලකුණු සංඛ්‍යාව ලෙසය. විශිෂ්ට පන්දුයැවීමක නිරත වූ මල්ෂා ශෙහානි ලකුණු 2කට කඩුලු 4ක් දවා ගත්තාය.

එම දක්ෂතාව වාර්තා අතරට එක් වූයේ ශ්‍රී ලංකා ක්‍රීඩිකාවන් ජාත්‍යන්තර 20-20 තරගයක වාර්තා කළ හොඳම පන්දුයැවීම ලෙසය. ශ්‍රී ලංකා කාන්තා කණ්ඩායම ලද මෙම ජයග්‍රහණයත් සමග ප්‍රසාද ලකුණු සටහනේ 3වන ස්ථානයට පැමිණ තිබේ.