බස් රථයක් සහ ත්‍රීරෝද රථයක් මුහුණට මුහුණ ගැටී අඹුසැමි යුවලක් මියයයි.(PHOTOS)
Aruna
in ශ්‍රී ලංකාවබදුල්ල - මහියංගණ මාර්ගයේ පුවක්ගොඩමුල්ල ප්‍රදේශයේ දී දෙහිඅත්තකණ්ඩිය ශ්‍රී ලංගම ඩිපෝවට අයත් බස් රථයක් හා ත්‍රීරෝද රථයක මුහුණට මුහුණ ගැටී සිදු වූ අනතුරෙන් ත්‍රීරෝද රථයේ ගමන්ගත් අඹු සැමි යුවලක් ජීවිතක්ෂයට පත්වූ අවාසනාවන්ත සිදුවීමක් වාර්තා වනවා.
මොවුන් බදුල්ල මැදපතන ප්‍රදේශයේ පදිංචිකරුවන් වන අතර මියගිය සැමියා 79 හැවිරිදි වියේත් බිරිඳ 76 හැවිරිදි වියේ පසුවන බවයි වාර්තා වන්නේ.
මෙම අනතුරෙන් තවත් තිදෙනෙක් තුවාල ලබා බදුල්ල ශික්ෂණ රෝහලේ ප්‍රතිකාර ලබමින් පවතී.
විමර්ශනවල දී අනාවරණය වී තිබෙන්නේ, අනතුර සිදු වන අවස්ථාවේදී බස්රථය දෙහිඅත්තකණ්ඩිය - සිරිපුර ප්‍රදේශයේ සිට බදුල්ල දක්වා ධාවනය වෙමින් පැවති අතර ත්‍රීරෝද රථය බදුල්ල හා රිදීපන අතර මගීන් ප්‍රවාහනය කරන පනහෙ කෑලි නම් වන ත්‍රීරෝද රථයක් බවටයි.
අනතුරු සම්බන්ධයෙන් බස් රථයේ රියදුරු අත්අඩංගුවට ගෙන ඇති බවයි, පොලිසිය සඳහන් කළේ.
