පෞද්ගලිකත්වයට තර්ජනයක්. - සමාජ මාධ්‍ය භාවිතා කරන අයට අනතුරු ඇඟවීමක්.
Wayomi
in ශ්‍රී ලංකාවවිවිධ පුද්ගලයන්ගේ පෞද්ගලික තොරතුරු ඇතුළත් ඇතැම් වෙබ් අඩවිවලින් ගන්නා දත්ත පරිගණක අපරාධකරුවන් විසින් අපරාධ සඳහා යොදාගන්නා බව පරිගණක අපරාධ විමර්ශන කොට්ඨාසය අනාවරණය කරගෙන තිබෙනවා.
ඒ, අනුව අන්තර්ජාලය භාවිතයේදී පරිශීලකයන්ගේ සංවේදී පෞද්ගලික තොරතුරු අන්සතුවීම වැළැක්වීමට වෙබ් අඩවි නිර්මාණයේදී විවිධ ආරක්ෂිත ක්‍රමෝපායන් අනුගමනය කරනු ලබනවා.
කෙසේ වෙතත් ඇතැම් රජයේ හා පෞද්ගලික වෙබ් අඩවිවල තොරතුරු ඉතා පහසුවෙන් තෙවැනි පාර්ශ්වයකට ගැනීමේ හැකියාව පවතින අතර ඇතැම් ජීව දත්ත සටහන්වල අඩංගු අධ්‍යාපන සහ වෘත්තිය සුදුසුකම් ආදිය පවා මෙලෙස ගැනීමේ හැකියාවක් ඇත.
පරිගණක අපරාධ විමර්ශන කොට්ඨාසය පෙන්වා දෙන්නේ, මෙවැනි සංවේදී දත්ත ඇතුළත් කර ඇති ෆේස්බුක්, වට්ස්ඇප් සහ ඊමේල් ආදී පෞද්ගලික ගිණුම් අපරාධකරුවන්ගේ ග්‍රහණයට නතුවීමේ හැකියාවක් පවතින බවයි.
එමෙන්ම මෙවැනි සංවේදී දත්ත සොරා ගන්නා අයට වෙනත් පුද්ගලයන්ගේ බැංකු ගිණුම් පවා අන්සතු කරගැනීමේ හැකියාවක් ඇති බව ද එම කොට්ඨාසයේ සහකාර පොලිස් අධිකාරී චන්දිමා අරුමප්පෙරුම සඳහන් කළා.
නමුත් ඇතැමුන්ගේ පෞද්ගලික දත්ත ඇතුළත් කිරීමට අවශ්‍ය වන්නේ නම් අදාළ නිලධාරින් විසින් එම වෙබ් අඩවිවල ආරක්ෂාව තහවුරු කළ යුතු බවත්, තමන්ගේ පෞද්ගලික තොරතුරු සමාජ මාධ්‍යයේ ප්‍රසිද්ධ කිරීමට පෙර දෙවරක් සිතිය යුතු බවත් පරිගණක අපරාධ විමර්ශන කොට්ඨාසය වැඩිදුරටත් අවධාරණය කරනවා.
