ඇමරිකාවේ උපාධියෙන් පසු වැඩ කරන්න ඩොලර් 70,000ක්.. ලාංකික සිසුන්ටත් බලපායිද?
ඇමරිකා එක්සත් ජනපදයේ විදේශීය සිසුන් සඳහා ක්‍රියාත්මක Optional Practical Training (OPT) වැඩසටහනට අදාළව ඩොලර් 70,000ක නව ගාස්තුවක් හඳුන්වා දීමට එරට ස්වදේශ ආරක්ෂක දෙපාර්තමේන්තුව යෝජනා කර තිබෙනවා.
යෝජනාවට අනුව, පළමු OPT නිර්දේශය සඳහා ඩොලර් 70,000ක් ද, ඉන් පසු සිදුකරන සෑම OPT නිර්දේශයක් සඳහාම ඩොලර් 30,000ක අමතර ගාස්තුවක් ද අදාළ අධ්‍යාපන ආයතන විසින් ගෙවිය යුතුයි. මෙයට STEM ක්ෂේත්‍රවල සිසුන් සඳහා වන දීර්ඝ කිරීම් ද ඇතුළත් වනවා.
F-1 ශිෂ්‍ය වීසා යටතේ ඇමරිකාවේ අධ්‍යාපනය ලබන විදේශීය සිසුන්ට සිය අධ්‍යයන ක්ෂේත්‍රයට අදාළව රැකියා පළපුරුද්ද ලබාගැනීමට OPT වැඩසටහන අවස්ථාව සලසනවා.
වීසා වංචා වැළැක්වීම, සංක්‍රමණ පද්ධතියේ විශ්වාසනීයත්වය ආරක්ෂා කිරීම සහ ඇමරිකානු සේවකයන්ගේ අවශ්‍යතා සුරක්ෂිත කිරීම මෙම යෝජනාවේ අරමුණු බව බලධාරීන් පවසනවා.
කෙසේ වෙතත්, මෙම ගාස්තු සංශෝධනය තවමත් යෝජනා මට්ටමේ පවතින අතර, එය අවසන් රෙගුලාසියක් ලෙස අනුමත කර ක්‍රියාත්මක කර නැහැ. යෝජනාව පිළිබඳ මහජන අදහස් ඉදිරිපත් කිරීම සඳහා 2026 නොවැම්බර් 9 දක්වා කාලය ලබාදී තිබෙනවා.
යෝජනාව ක්‍රියාත්මක වුවහොත්, ඇමරිකාවේ අධ්‍යාපනයෙන් පසු රැකියා පළපුරුද්ද ලබාගැනීමට අපේක්ෂා කරන ඉන්දියානු සිසුන් ඇතුළු විදේශීය සිසුන්ට සහ ඔවුන්ගේ අධ්‍යාපන ආයතනවලට සැලකිය යුතු මූල්‍ය බලපෑමක් ඇති විය හැකියි.
