ජාතික රූපවාහිනියට හදිසියේම සිදුවෙන්නට යන දේ ගැන ආන්දෝලනාත්මක හෙළිදරව්වක්....

ස්වෙච්චාවෙන් සේවයෙන් ඉවත් වීමට කැමති ජාතික රූපවාහිනි සංස්ථාවේ සේවකයන් සඳහා අයදුම්පත් ඉදිරිපත් කරන ලෙස දැනුම් දී තිබෙනවා.

ශ්‍රී ලංකා රූපවාහිනී සංස්ථාවේ අධ්‍යක්ෂ ජෙනරාල් අසංග ජයලත් මහතා විසින් මෙම දැනුම් දීම කර ඇත.

අදාළ නිවේදනයට අධ්‍යක්ෂ ජෙනරාල්වරයා අත්සන් තබා ඇත්තේ ඉකුත් 28වැනිදාය.

නිවේදනයට අනුව 1982 සිට වසර 42ක කාලයක් රාජ්‍ය සංස්ථාවක් ලෙස පවත්වා ගෙන ආ ශ්‍රී ලංකා රුපවාහිනී සංස්ථාව මේ වන විට වෙනත් සාධක හේතුවෙන් ලාභ ලබන ආයතනයක් ලෙස පවත්වා ගැනීමේ අභියෝගයට මුහුණ දී තිබේ.

ඒ අනුව ස්වේච්ඡාවෙන් සේවයෙන් ඉවත් වන්නන් සඳහා පදනම් දෙකක් ඉදිරිපත් කර ඇත.

ඒ වසර 10ක් හෝ ඊට වඩා වැඩි කාලයක සේවය කළ සේවකයන් සහ වසර 10ට වඩා අඩු කාලයක් සේවය කළ සේවකයන් ලෙසය.

ස්වේච්ඡාවෙන් සේවයෙන් ඉවත්ව යන සේවකයන් වෙනුවෙන් වන්දිය ලෙස යෝජනා කර ඇත්තේ අවම රු. දෙලක්ෂ පනස් දහසක් සහ උපරිම රු. ලක්ෂ 25ක් ලෙසයි.

එහෙත් ඒ සඳහා ප්‍රාථමික ශ්‍රේණි, ද්විතක ශ්‍රේණි සහ මාණ්ඩලික ශ්‍රේණි ලෙස වෙන් වෙන්ව සලකා බලෙන අතර සේවා කළ කාලය සහ සේවය කිරීමට ඇති කාලයද සලකා බලෙන බව අධ්‍යක්ෂ ජෙනරාල්වරයා සදහන් කර ඇත.

යෝජනා ක්‍රමය සදහා හිමිකම් ඇත්තේ වයස අවුරුදු 50ට අඩු සේවකයන්ට පමණක් වන අතර වන්දි ගණනය කිරීමේදී වෛකල්පිත විශ්‍රාම වයස ලෙස ගණන් ගැනෙන්නේ වයස අවුදු 55 බව කියැවේ.

මේ පිළිබඳව වැඩිදුරටත් අදහස් දැක්වූ ශ්‍රී ලංකා රුපවාහිනී සංස්ථාවේ වෘත්තීය සමිති නියෝජිතයෙකු අප සමඟ කියා සිටියේ, රාජ්‍ය ආයතන පාඩු ලැබීමට සලස්වා වසා දැමීමේ ආණ්ඩුවේ උවමනාව මත ජාතික රුපවාහිනිය විකුණා දැමීමේ පළමු පියවර ලෙස මෙම විශ්‍රාම ගැන්වීම හඳුන්වා දී ඇති බවයි.

කෙසේ නමුත් මේවන විට ජාතික රූපවාහිනිය බරපතල කඩා වැටීමකට ලක්ව ඇති බව සියලු දෙනා පිළිගන්නා කරුණකි.

අවස්ථා කිහිපයක දී රූපවාහිනියේ හිඟ විදුලි ගාස්තු හේතුවෙන් විදුලි ය විසන්ධි කෙරුණි.

එසෙම් මෑතකදී අන්තර් ජාලා සේවාවන් අත්හිටුවීමට අදාළ නිවේදනයක් ද පැමිණ තිබුණි.

මීට අමතරව මෙතෙක් සවස 6.50ට විකාශය වූ ජාතික රූපවාහිනී ප්‍රධාන සිංහල ප්‍රවෘත්ති ප්‍රකාශය නැවත රාත්‍රී 08ට ගෙන ඇත.

එය එසේ වුවද මාර්තු මස 01වැනිදා සිට විකාශය වූ පැයෙන් පැය ප්‍රවෘත්ති ප්‍රකාශ සියල්ල නතර කිරීමට පාලනාධිකාරිය පියවර ගෙන ඇත්තේ ඒ සඳහා වැය කිරීමට මුදල් නොමැති වීම හේතුවෙනි.

නමුත් පුදුමය දනවන කරුණ නම් පසුගියදා නවක ප්‍රවෘත්ති නිවේදක නිවේදිකාවන් බඳවා ගැනීම සදහා 2000කට ආසන්න අයදුම්පත් කැදවා රූපවාහිනිය සම්මුඛ පරීක්‍ෂණ පැවැත්වීමයි.

මෙහි ගැටලුව ඇත්තේ ප්‍රවෘත්ති ප්‍රකාශ නවතා දමා අලුතින් ගන්නා නිවේදකයින් කුමන ප්‍රවෘත්ති ප්‍රකාශ සදහා යොමු කරන්නේ ද යන්නය.

එසේම ජනවාරි මාසයේ සිට රූපවාහිනියේ කලක් සිට පසුව නාලිකා කිහිපයක සේවය කළ හා අනතුරුව ස්වර්ණවාහිනියෙන් ද එළියට දැමූ නදීක කරුණානායක හා තිළිණි පෙරේරා ජාතික රූපවාහිනියේ ප්‍රධාන ප්‍රවෘත්ති කියවීම සදහා වැඩි අවස්ථාවන් ලබා දෙමින් අධ්‍යක්‍ෂ ජනරාල්වරයා එක් කරගෙන තිබුණි.

රූපවාහිනී ප්‍රවෘත්ති අංශයේ බොහෝ පිරිසකගේ දැඩි විරෝධතාවක් මධ්‍යයේ මෙම පියවර ගැනීම කණගාටුවක් බවයි රුපවාහිනී සංස්ථාවේ වෘත්තීය සමිති නියෝජිතයා වැඩිදුරටත් ප්‍රකාශ කළේ.

එම ක්‍රියාවලිය හේතුවෙන් මෙතෙක් ප්‍රවෘත්ති ඉදිරිපත් කළ රූපවාහිනියේ ජ්‍යෙෂ්ඨ ප්‍රවෘත්ති නිවේදක නිවේදිකාවන් රැසකට සිදු වූයේ මාසයකට ප්‍රවෘත්ති දෙකක් පමණක් ඉදිරිපත් කිරීමටය.

මෙය ඇතුළු තවත් කරුණු රැසක් යටතේ මේවන විට රූපවාහිනී ප්‍රවෘත්ති අංශයට ද අත්වී තිබෙන්නේ දරුණු කඩා වැටීමකි.

මීට අමතරව විකාශය කෙරුණි වැඩසටහන් ගණනාවක් ලාභයක් නොමැතිකමින් මාර්තු 01වැනිදා සිට නතර කිරීමට පියවර ගෙන ඇත.

නමුත් පසුගිය ගත වූ මාස දෙකක පමණ කාලයේ දී රූපවාහිනිය උදෑසන 06.00 සිට උදෑසන 07.00 දක්වා OFF BEAT යනුවෙන් නව උදෑසන සජීව වැඩසටහනක් හදුන්වා දෙන ලද්දේ එතෙක් දැඩි ප්‍රේක්ෂක ප්‍රතිචාර හිමිවූ උදෑසන විදෙස් පුවත් තොරතුරු සාකච්ඡා කෙරෙන ‘සිව්දෙස‘ වැඩසටහන නතර කරමින්ය.

කෙසේ නමුත් OFF BEAT අසාර්ථකත්වය හමුවේ යළිත් පසුගියදා සිට සිව්දෙස යළිත් ආරම්භ කිරීමට පාලනාධිකාරිය පියවර ගෙන ඇත.

කෙසේ වෙතත් මෙම යෝජනාවට විරෝධය පල කරන සංස්ථාවේ වෘත්තීය සමිති නියෝජිතයන් සඳහන් කරන්නේ පාලකයන් මේ උත්සාහ කරන්නේ ආයතනය පාඩු ලබන බව පවසමින් විකුණා දැමීමේ කටයුත්තට බවයි.

ජනතාවගේ බදු මුදලින් යැපෙමින්,පාඩු ලබන ආයතනයක් ලෙස ජාතික නාලිකාවට අත්වෙමින් යන ඉරණම පිළිබඳව රටේ සියලු දෙනාම අවදියෙන් සිටිය යුතු කාලයක් බව කනගාටුවෙන් වුවද දැනුම් දෙන්නට සිදුවී තිබේ.

ඉදිරියේදී මේ පිළිබඳව තවත් තොරතුරු බලාපොරොත්තු වන්න.