"..අහිංසක කොල්ලෝ දෙන්නෙක් ඇයි අරන් ආවේ.." පොලීසිය ඉදිරිපිටට විශාල පිරිසක් එයි..දැඩි උණුසුම් තත්ත්වයක්..! (VIDEO)

 අද (16) දහවල් මාතර, වැලිගම පොලීසිය ඉදිරිපිට උණුසුම් තත්ත්වයක් හට ගෙන තිබේ. ඒ වැලිගම දෙණිපිටිය ප්‍රදේශයේ අවුරුදු 12ක දැරියකට ලිංගික අතවර කිරීමේ සිද්ධියක් සම්බන්ධයෙන් අත්අඩංගුවට ගත් තරුණයින් එයට සම්බන්ධ නොමැති බව පවසමින්ය.

පසුගිය දා අතිරේක පන්තියකට සහභාගී වී අදාළ දැරිය නිවස කරා යමින් සිටිය දී තරුණයින් සිව්දෙනෙක් විසින් පැහැරගෙන ගොස් ලිංගික අතවර සිදුකර තිබුණු අතර, ඒ සම්බන්ධයෙන් දැරියගේ දෙමාපියන් සිදුකළ පැමිණිල්ලක් මත වැලිගම පොලීසිය වැඩිදුර පරීක්ෂණ ආරම්භ කර තිබේ.

ඒ අනුව අදාළ සිදුවීමට සම්බන්ධ බවට සැකකෙරෙන තරුණයින් දෙදෙනෙක් ඊයේ සවස දෙණිපිටිය ප්‍රදේශයේ දී අත්අඩංගුවට ගෙන තිබුණි. එයට විරෝධය පළ කරමින් අත්අඩංගුවට ගත් තරුණයින්ගේ ඥාතීන් කෑ කෝ ගසමින් පොලීසිය ඉදිරියට රැස්ව පවසා සිටියේ පොලීසිය විසින් අත්අඩංගුවට ගත් දෙදෙනා අදාළ සිදුවීමට සම්බන්ධ නොවන බවය. එමෙන්ම තරුණයින් ට පොලීසිය තුළ දී පහරදීමක් සිදුකර ඇතැයි ද අත්අඩංගුවට පත් තරුණයෙකුගේ මව පැවසීය.

"අපේ පොඩි එක්කෙනා වැඩට යන්න ගියේ. එතකොට පොඩි ළමයෙක් එක්කන් ඇවිත් මෙයාද කියලා ඇහුවා. එයා මෙයා නෙමෙයි කියද්දිත් අරන් ඇවිල්ලා. ප්‍රශ්න කරන්න අරන් ඇවිල්ලා ගහලත් එක්ක. අපි කියන්නේ ඒ ළමයටත් සාධාරණයක් කරන්න ඕනේ. අහිංසක කොල්ලෝ දෙන්නෙක් ඇයි අරන් ආවේ. හරියට සාධාරණයක් කරන්න.... ළමයි හතරදෙනෙක් එකතුවෙලා ඒ ළමයට කරදර කරලා කියලා කියනවා. ඒ ළමයින්ගේ තාත්තලා කියනවා මේ ළමයි දෙන්නා නෙමෙයි කියලා. ඒ කට්ටිය එන්නම්ලු කියන්න. ඒ වුණාට පොලීසියෙන් දෙන්නේ නැත්තේ..." කෙසේවෙතත් සැකකරුවන් අධිකරණය වෙත ඉදිරිපත් කිරීමට නියමිතය.

(වීඩියෝ - අද දෙරණ)