පිළිකා නාශක ඖෂධයක් ගැන ඊයේ සිදු වූ ආන්දෝලනාත්මක හෙළිදරව්ව. - කෙහෙළියගේ ගැන්සියට තවත් වෛද්‍යවරයෙක් එක්වෙයි. - (VIDEO)
Wayomi
in ශ්‍රී ලංකාවආන්දෝලනාත්මක ප්‍රමිතියෙන් තොර ප්‍රතිදේහ එන්නත් වංචාවට අදාළව හිටපු සෞඛ්‍ය අමාත්‍ය කෙහෙළිය රඹුක්වැල්ල ඇතුළු සැකකරුවන් 6 දෙනෙකු නඩු විභාගය අවසන් වනතුරු රක්ෂිත බන්ධනාගාරගත කිරීමට මාලිගාකන්ද මහෙස්ත්‍රාත් අධිකරණය ඊයේ (14) නියෝග කළා.
මෙහිදී ප්‍රමිතියෙන් තොර ප්‍රතිදේහ එන්නත් වංචාවට අදාළ ප්‍රශ්නගත ඖෂධ සැපයුම්කරු විසින් සපයා ඇති පිළිකා නාශක ඖෂධයක් ද ප්‍රමිතියෙන් තොර බවට වාර්තාවකින් තහවුරු වූ බව ඊයේ (14) අධිකරණයේදී අනාවරණය වුණා.
ප්‍රමිතියෙන් තොර හියුමන් ඉමියුනෝග්ලොබියුලීන් එන්නත් මිලදී ගැනීමේ සිද්ධියට අදාළව වෛද්‍ය සැපයුම් ඒකකයේ නියෝජ්‍ය අධ්‍යක්ෂ වෛද්‍ය තුසිත සුදර්ශන ද අපරාධ පරීක්ෂණ දෙපාර්තමේන්තුව විසින් පෙරේදා (13) රාත්‍රියේ අත්අඩංගුවට ගනු ලැබුවා.
විදෙස්ගතව සිට පෙරේදා දිවයිනට පැමිණි වෛද්‍යවරයා ප්‍රකාශයක් ලබාගැනීම සඳහා අපරාධ පරීක්ෂණ දෙපාර්තමේන්තුව වෙත කැඳවීමෙන් පසු අත්අඩංගුවට ගෙන තිබූ අතර, මොහු ප්‍රතිදේහ එන්නත් සිද්ධියට අදාළ ප්‍රසම්පාදන ක්‍රියාවලියේ ඇගයීම් කමිටු සාමාජිකයෙක් ලෙස ද කටයුතු කර ඇත.
සැකකරු ඊයේ දහවල් මාලිගාකන්ද මහෙස්ත්‍රාත් අධිකරණය වෙත ඉදිරිපත් කෙරුණේ ප්‍රමිතියෙන් තොර හියුමන් ඉමියුනෝග්ලොබියුලීන් එන්නත් සම්බන්ධ නඩුව ද ඊයේ යළි කැඳවු අවස්ථාවේදීයි.
ඒ අනුව දැනට රක්ෂිත බන්ධනාගාරගත කර සිටින හිටපු සෞඛ්‍ය අමාත්‍ය කෙහෙලිය රඹුක්වැල්ල මහතා ඇතුළු සැකකරුවන් 8 දෙනා බන්ධනාගාර නිලධාරීන් විසින් අධිකරණයට ඉදිරිපත් කළ අතර අනතුරුව වැඩිදුර විමර්ශන සම්බන්ධයෙන් රජයේ නියෝජ්‍ය සොලිසිටර් ජනරාල් ලක්මිණී ගිරිහාගම මෙනවිය අධිකරණය හමුවේ කරුණු දක්වනු ලැබුවා.
''ස්වාමීනි, අද දින ඔබතුමන්ගේ අධිකරණයට ඉදිරිපත් කර ඇති තුසිත සුදර්ශන නැමැති මෙම සැකකරු මෙම නඩුවේ 11 වන සැකකරු ලෙස නම් කරන ලෙස මා අධිකරණයෙන් ඉල්ලා සිටිනවා. හියුමන් ඉමියුනෝග්ලොබියුලීන් නම් ප්‍රශ්නගත ඖෂධයට අදාළ ප්‍රසම්පාදන ක්‍රියාවලියේදි ඇගයීම් කමිටුවේ සාමාජිකයෙකු ලෙස කටයුතු කළ වෛද්‍යවරුන් දෙදෙනාගෙන් එක් අයෙකු මෙම තැනැත්තා වන අතර අනෙක් වෛද්‍යවරයා මේ වන විටත් අධිකරණය මගහැර විදෙස්ගතව සිටිනවා. ස්වාමීනි ප්‍රසම්පාදනයට අදාළ ඇගයිම් කමිටුව තුළ කටයුතු කිරීමේදී මොවුන්ගේ වගකීම වෙන්නේ ප්‍රසම්පාදනයට ලක්වන ඖෂධයේ ගුණාත්මකභාවය හා සැපයුම්කරු පිළිබඳ සත්‍ය තොරතුරු නිර්දේශ කිරීමයි. නමුත් ස්වාමීනි මොවුන් දේශීයව නිෂ්පාදනය කළ නොහැකි ඖෂධයක් සැපයීම, දේශිය සැපයුම්කරුවෙකුට ලබාදිමයි මෙම මහා අපරාධයට හේතු සාධක වුණේ. ඊට හේතුව විමසුවාම මොවුන් කියනවා අපි හිතුවේ ඉන්දියාවෙන් ගෙනල්ලා සැපයීම සිදු කරයි කියලා. නමුත් ස්වාමීනි ඔවුන්ගේ හිතලුමත බෙහෙත් තෝරන්න නොවෙයි රටේ ජනතාව බදු ගෙවන්නේ. විත්තිකුඩුවේ සිටින මෙම සැකකරුවන් එන්නත් මාත්‍රාවේ ප්‍රමිතිය පරික්ෂාවට ලක්කිරීම එක් එක් අයට පවරනවා. මම අහන්න කැමතියි මේ විත්තිකූඩුවේ සිටින කිසිවෙකුත් එන්නත් මාත්‍රාවේ ප්‍රමිතිය පරික්ෂා කිරීමේ වගකීම භාරගන්නේ නැත්නම් එන්නත ලබාගන්න රෝගීන්ද එහි පරික්ෂාවට ලක්කරන්න ඕන කියලා. "
මේ අතර ප්‍රශ්නගත හියුමන් ඉමියුනෝග්ලොබියුලීන් සැපයුම්කරු විසින් වෛද්‍ය සැපයුම් අංශයට සපයන ලදැයි මීට පෙර කරුණු අනාවරණ වී තිබු පිළිකා නාශක ඖෂධය සම්බන්ධයෙන් ප්‍රමිති වාර්තාවක් ද නියෝජ්‍ය සොලිසිටර් ජනරාල්වරිය අධිකරණයට ඉදිරිපත් කළා.
'' ස්වාමීනී, මෙම ප්‍රශ්නගත ඖෂධ සැපයුම්කරු විසින්ම සැපයු තවත් ඖෂධයක් තමයි රිටොක්සිමැප් කියන්නේ. එම ඖෂධ මාත්‍රා 2,250ක් සැපයීමට ප්‍රශ්නගත සැපයුම්කරුට ටෙන්ඩරය ප්‍රධානය කර තිබෙන්නේ හියුමන් ඉමියුනෝග්ලොබියුලීන් එන්නත් මාත්‍රාව වගේම ප්‍රමාණවත් තොග සෞඛ්‍ය අංශය තුළ තිබියදියි. ඒ අනුව මෙම සැපයුම්කරු අවස්ථා 4කදි රිටොක්සිමැප් එන්නත් මාත්‍රා 2200 ක් වෛද්‍ය සැපයුම් අංශයට සපයා තිබෙනවා. ස්වාමීනි, එම ඖෂධයේ ප්‍රමිතිය සම්බන්ධයෙන් මහරගම අපෙක්ෂා රෝහලේ පිළිකා ආයතනයෙන් අප ප්‍රමිති වාර්තාවක් කැඳෙව්වා. එම වාර්තාව ජාතික ඖෂධ නියාමන අධිකාරිය විසින් අද දින අධිකරණයට ඉදිරිපත් කර තිබෙනවා. ස්වාමීනි රිටොක්සිමැප් ඖෂධය පිළිකා රෝගයෙන් සුව වීමට අදාළ වෙන්නේ එහි මොනකෝනල් නමැති පිළිකා නාශක ප්‍රතිදේහයට අන්තර්ගත වුණොත් විතරයි. නමුත් ස්වාමීනි මෙම සැපයුම්කරු සපයා ඇති රිටොක්සිමැප් කියන්නා වු මාත්‍රාවල එම ප්‍රතිදේහය කිසිඳු ලෙසකින් අන්තර්ගත වෙලා නැහැ. එය හුදෙක් හියුමන් ඉමියුනෝග්ලොබියුලීන් සැපයුවා වගේම නිකන්ම නිකන් ද්‍රාවණ සැපයීමක් විතරයි. එවැනි ද්‍රාවණයකට තමයි රටේ බදු ගෙවන ජනතාවගේ මුදලින් රුපියල් ලක්ෂ 1000ක් ගෙවලා තියෙන්නේ. ස්වාමීනි, එම ඖෂධය ප්‍රශ්නගත වෙලා අධිකරණ නියෝගයකින් එම එන්නත් මාත්‍රා තොග යළි කැඳවන විටත් බෙදාහරින ලද එන්නත් මාත්‍රා 2200 න් 1200ක්ම භාවිත වෙලා තිබුණා. ඉතිරිවෙලා තිබුණේ එන්නත් මාත්‍රා 1000 ක් විතරයි. "
අනතුරුව මෙම නඩුවේ 1, 2 , 3, 4 , 6, 8 සැකකරුවන් මීට පෙර අධිකරණයට ඉදිරිපත් කර තිබු ඇප අයදුම් සම්බන්ධයෙන් වන නියෝගය මහෙස්ත්‍රාත් ලෝචනි අබේවික්‍රම මහත්මිය විසින් ප්‍රකාශයට පත්කරනු ලැබුවා.
"විත්ති පාර්ශ්වය දරන ප්‍රධාන ස්ථාවරයක් තමයි තම සේවාදායකයින්ට එරෙහිව නගා ඇති චෝදනා පොදු දේපළ පනත යටතට ගැනෙන්නේ නැහැ කියන එක. නමුත් පළමු සැකකරුට එන්නත් මාත්‍රා සඳහා සිදු කරන ලද ගෙවීම රු.25,000 කට වඩා වැඩිවීමත් එය සෞඛ්‍ය අමාත්‍යංශයේ වැය ශීර්ෂයෙන් එනම් මහජන මුදලින් ගෙවා තිබිමත් තුළ සියලු විත්තිකරුවන් සම්බන්ධයෙන් පොදු දේපළ පනත අදාළ වන බව අධිකරණයේ ස්ථාවරයයි. මොකද රජයේ දේපළවල වටිනාකම පිළිබඳ නිලධාරින්ටත් වගකීමක් තියෙනවා. ඒ අනුව පොදු දේපළ පනතෙහි ප්‍රතිපාදනය තමයි විත්තිකරුවන් සුවිශේෂි කරුණු ඉදිරිපත් නොකරන්නේ නම් නඩු විභාගය අවසන් වනතුරු රක්ෂිත බන්ධානගාරගත කිරීම. එමෙන්ම සුවිශේෂි කරුණු නොසලකා සාමාන්‍ය ඇප දීම රීතියක් ලෙස සැලකුවත් පවතින මහජන කැලඹීම මත ඇප ප්‍රදානය කරන්න බැහැ. එබැවින් මෙම කරුණු සැලකිල්ලට ගනිමින් 1, 2 , 3 , 4 , 6, 7, 8 සැකකරුවන් සම්න්ධයෙන් සිදු කළ ඇප අයැදුම් ප්‍රතික්ෂේප කිරිමට මෙම අධිකරණය තීරණය කරනවා. "
මේ අනුව හිටපු සෞඛ්‍ය අමාත්‍ය කෙහෙලිය රඹුක්වැල්ල ,හිටපු සෞඛ්‍ය ලේකම් ජනක ශ්‍රි චන්ද්‍රගුප්ත ඇතුළු සැකකරුවන් 6දෙනා නඩු විභාගය අවසන් වනතුරු රක්ෂිත බන්ධානාගරගත කිරීමට මහෙස්ත්‍රාත් ලෝචනී අබේවික්‍රම මහත්මිය ප්‍රකාශ කළ අතර අපරාධ පරීක්ෂණ දෙපාර්තමේන්තුව ඊයේ අත්අඩංගුවට ගත් වෛද්‍ය සැපයුම් ඒකකයේ නියෝජ්‍ය අධ්‍යක්ෂ වෛද්‍ය තුසිත සුදර්ශන හා සෞඛ්‍ය අමාත්‍යංශයේ අතිරේක ලේකම් සමන් රත්නායක මාර්තු මස 28 වනදා දක්වා තවදුරටත් රක්ෂිත බන්ධානාගරගත කිරිමට මහෙස්ත්‍රාත් අධිකරණය නියෝග කරනු ලැබුවා.
