හරක් කටාගෙන් සන්තෝසම් ගත් CID නිලධාරීන්ට වෙන්න යන දේ.
Wayomi
in ශ්‍රී ලංකාවකුප්රකට පාතාල මත්ද්‍රව්‍ය ජාවාරම්කරුවකු වන නදුන් චින්තක හෙවත් හරක් කටා හා සම්බන්ධ බවට චෝදනා එල්ල වී ඇති අපරාධ පරීක්ෂණ දෙපාර්තමේන්තුවේ ජ්‍යෙෂ්ඨ පොලිස් අධිකාරිවරයකු, සහකාර පොලිස් අධිකාරිවරයකු සහ විශ්‍රාමික ප්‍රබල පොලිස් නිලධාරියකු සහ තවත් පොලිස් නිලධාරීන් 19 දෙනකු සම්බන්ධයෙන් විශේෂ විමර්ශන ඒකකය (SIU) සහ ත්‍රස්ත විමර්ශන ඒකකය (TID) දැනටමත් විමර්ශන ආරම්භ කර ඇති බව ආරංචි මාර්ග පවසනවා.
ඒ, අපරාධ පරීක්ෂණ දෙපාර්තමේන්තුවේ සහ අනෙකුත් දෙපාර්තමේන්තුවල සේවය කරන ඇතැම් නිලධාරින්ට හරක් කටාගෙන් මුදල් සහ වෙනත් ආකාරවලින් විශාල තෑගි ප්‍රමාණයක් ලැබී ඇති බවට වාර්තා වී තිබීම හේතුවෙන්.
මෙම චෝදනා සම්බන්ධයෙන් පොලිස් මූලස්ථානය අපරාධ පරීක්ෂණ දෙපාර්තමේන්තුවට අනුයුක්තව සිටි සහකාර පොලිස් අධිකාරිවරයකුට මීට පෙර ස්ථාන මාරුවක් ලබාදී තිබූ අතර මෙම චෝදනාවල‍ට ලක්වූ තවත් ජ්‍යෙෂ්ඨ නිලධාරින් කිහිප දෙනකුට ද ස්ථාන මාරුවීම් ලබාදී ඇති බව ද ආරංචි මාර්ග සඳහන් කරනවා.
මේ අතර හරක් කටාට අපරාධ පරීක්ෂණ දෙපාර්තමේන්තුවෙන් පැන යාමට ආධාර අනුබල දීම සම්බන්ධයෙන් පොලිස් නිලධාරීන් කිහිපදෙනෙක් අත්අඩංගුවට ගෙන රක්ෂිත බන්ධනාගාර ගත ඇත.
පසුගිය වසරේ මාර්තු 15 වැනිදා හරක් කටා යළි දිවයිනට ගෙන්වාගෙන අපරාධ පරීක්ෂණ දෙපාර්තමේන්තුව විසින් රඳවා ගනු ලැබුවා.
‘හරක් කටා’ අපරාධ පරීක්ෂණ දෙපාර්තමේන්තුවේ රඳවා සිටියදී පැන යාමට උත්සාහ කළ නමුත් ඔහුගේ උත්සාහය ව්‍යර්ථ විය. ත්‍රස්ත විමර්ශන කොට්ඨාසය සහ පොලිස් මූලස්ථානයේ විශේෂ විමර්ශන ඒකකය සිද්ධිය සම්බන්ධයෙන් විමර්ශනයක් ආරම්භ කළ අතර එයින් හරක් කටාගේ පලායාමට අපරාධ පරීක්ෂණ දෙපාර්තමේන්තුවට අනුයුක්තව සේවය කළ නිලධාරීන් ඇතුළු පොලිස් නිලධාරීන් කිහිප දෙනකුගේ සහය ලැබී ඇති බව අනාවරණය වුණා.
